P3.737 trillion national budget

Mao kini ang atong budget sa tuig 2018 nga i-submit ni Presidente Digong Duterte ngadto sa Kongreso atol sa ikaduha niyang State of the Nation Address (SONA), pagbukas sa 17th Congress second regular session karong Hulyo 24.

Hinoon, matud ni Budget Secretary Benjamin Diokno nga ang maong budget wala pa mapresentar ngadto ni Presidente Duterte. Actually, ubos sa Constitution, ang presidente adunay 30 ka adlaw pag-submit sa national budget gikan sa pag-convene sa Kongreso, apan matud ni Diokno, ila kining isumiter atol sa SONA sa presidente.

Sa ato pa, advance kaayo. Aduna sila’y kapin sa lima ka buwan pag-deliberate niini, lahi sa unang mga administrasyon, diin may mga panahon nga ila na lang ipalusot ang daan nga budget.

Ang labing dako nga pahat sa budget adto paingon sa social services nga mokantidad og P1.551 trillion, diin ang education, culture, ug manpower development gahinan og P794 billion; ang alang sa social security, welfare, ug employment – P369.6 billion; ubang matang sa pangalagad sosyal – P209.6 billion; ug alang sa panglawas (health) – P177.6 billion.

Mao kini ang major thrust sa Duterte administration — social services. Gisundan kini sa economic services, mokabat og P1.106 trillion nga naglangkob sa gahin alang sa infrastructure, power, water, transportation & communication, agrarian reform, ug agriculture.

So, ang social ug economic services maoy nag-unang concern sa Duterte national budget.

* * *

Manghinaot kita nga madayon ang gilaraw ni Kongresista Gerald Anthony Gullas nga i-online ang mga renewal sa driver’s license ug sa registration sa mga sakyanan sa kadalanan.

 Pagkakaron, wala na ra ba’y naghisgot niini. Lagmit alang sa mga sakop sa Kongreso, dili kini urgent. Wala kini sa ilang mga priorities.

 Apan, wala lang tingali moabot sa ilang panghunahuna nga kining maong mga lakang, daghan ang mabulahan niini, nga makalingkawas na ang liboan ka driver ug mga car owner paglinawas sa pagduaw sa LTO matag pa-renew nila sa ilang mga lisensiya ug pagparehistro sa ilang mga sakyanan.

 Pagkakaron, 53% sa mga lisensiya ug mga permits nga gi-process sa LTO mga renewals, ug 80% sa mga car registrations mga renewals usab. Busa, kining maong mga lakang, makahatag og kasayon, convenience, dili lang sa mga driver ug sa mga nanag-iya’g  sakyanan, kondili, lakip na sa mga nagtrabaho sa LTO mismo.

Nahasubay usab kini sa tinguha ni Presidente Duterte, to improve and expedite the delivery of services. Apan, i-improve ug i-modernize una nato ang information technology capability sa LTO.