Mga benepisyo sa honey (1)

Kon wala pa kita makapahimulos sa kinatibuk-ang bentaha sa ‘Honey’ sa nutrisyonal ug sa medisinal nga kaayohang mahatag sa lawas ini, karon na nato sugdan, kay ang dugos usa ka talagsaon nga gamit sa pag-ayo, sa tanang matang nga sakit.

Ang  ‘Honey’, gigamit na kini sa katawhan sukad pa sa karaang panahon isip  ‘antibacterial’ ug ‘antifungal’, nga iyang nabatonan. Gani, dunay mga dokumento nga nagpamatuod gikan sa Greeks, Romans, ug Egyptians, nga ang dugos gihisgutan na kini ni Aristocles sa tuig 384 BC.

Bisan si Haring Solomon sa Bibliya, matud niya, mga anak kaon kamo og ‘Honey’ kay kini makaayo’. Ang tinuod usa kini sa karaang produkto nga nahimo na nga kabahin sa kadaghanan, ang natural nga pag-ayo. Ang ‘Honey’ dili lang ni panghulip nga asukar, naghatag sab ni og nutrisyon ug kahimsog sa kinabuhi.

Sa naandan ang usa ka kutsara sa ‘Honey’, nagbaton ni og 64 ka kaloriya nga wala’y fat o kolesterol. Duna kini mga vitamins, trace minerals, amino acids, calcium, sodium, iron, chlorine, magnesium, phosphate ug potassium nga pulos kini gikinahanglan sa maayong panglawas.

Tungod sa pagtaas sa lebel nga ‘alkaline’ sa lawas, ang daotan nga bakterya kapugngan nga dili makatubo, ug ang ‘antioxidants’ sa ‘Honey’, mopawagtang sa mga ‘free radicals’ nga maoy nakadaot sa lawas. Niini ang lawas luwas nga dili basta hugpaan og mga sakit.

Maisip ang ‘Honey’ nga maoy labing maayo usab nga natural nga panam-is (natural sweetener) sa planeta, nga kamenosan ang paggamit sa mga asukar nga kemikals o giproseso, nga karon maoy naglabi nga gigamit nga ingrediyente sa mga produkto sa pagkaon ug mga ilimnon.