Fake news sa 4Ps
Dili na makapakugang nga ang 4Ps (Pantawid Pamilya Pilipino Program) sa Department of Social Welfare and Development (DSWD) maoy labing uwahing nabiktima sa fake news sa fake rice. Kay sukad pa sa pagsugod sa 4Ps siyam ka tuig na ang nilabay, ang 4Ps nahiagom na sa daghang kontrobersiya.
Sukad gilusad ni kanhi Presidente Gloria Macapagal-Arroyo, gipalapdan ni kanhi Presidente Noynoy Aquino ug gipadayon ni Presidente Rodrigo Duterte, ang 4Ps wa gyud buwagi sa mga pasangil nga sama sa gikataho nga fake rice sa Sta. Fe sa Bantayan, napamatud-an nga wa’y sukaranan.
* * *
Sa sinugdanan, gidudahan ang 4Ps nga higanteng pamolitika. Ang mga politiko namugos nga iapil ang ilang mga dumadapig isip beneficiaries o nga tangtangon gikan sa programa ang mga wa kabotar nila.
Bisan ang mga senador ug mga kongresista nanagana sa paggahin og pundo alang sa 4Ps kay gilingla sila sa mga reklamo nga matag panghatag sa financial assistance mangligdas sa kahubog ang mga amahan sa mga pamilyang beneficiaries ug ang nahibilin sa hinabang gihurot sa mga sugal.
Apan tungod sa kamalampuson sa programa, gidaginot na lang og duhig sa nangalisbong bakak sa fake rice nga gipiyestahan sa social media.
* * *
Wa hinoo’y fake news, o intriga nga makalalis sa kamakiangayon sa mga kundisyon nga nakapahamtang sab hinoon og dagkong limitasyon sa 4Ps. Kahatagan og hinabang ang labing kabus nga mga pamilya kon makapabakuna ug makapatambal sa ilang mga masuso ug makapaeskuyla sa ilang mga bata.
Mao nga samtang naglaway lang sa programa ang mas kabus nga mga pamilya nga wa’y gagmay’ng mga anak, kaliboan sab ka pamilyang beneficiaries ang nakapagradwar sa ilang mga bata ug makabarug na sa ilang kaugalingong mga tiil.
* * *
Gipaimbestigar na ni DSWD-7 Regional Director Evelyn Macapobre ang pasangil nga gipugos ang beneficiaries sa Sta. Fe pagpalit og bugas humay nga ubos og kalidad ug bisan kon pipila nila mas ganahan og mais.
Nipasabot siya sa Arangkada sa DYAB Abante Pa, Bisaya! nga samtang cash, ug dili bugas ang ilang gihatag, gitugotan nila ang beneficiaries sa paghugpong ug pagnegosyo og bugas.
Apan gitataw ni Macapobre nga bisan ang kahugpongan sa beneficiaries dili makapugos sa mga sakop kinsa gawasnong mopili asa mopalit ug unsa nga matang sa bugas ang paliton.
* * *
- Latest
