EDITORYAL - Walay pagtagad
Nagbagulbol ang usa ka tiguwang lalaki diha nga nakakanaog na siya sa gisakyan niya nga public utility jeepney sa dalan Colon. Isog ang iyang tinan-awan samtang naglantaw sa PUJ nga kusog kaayong mipaturatoy pagpadagan, ug nagbilin kini’g itom kaayong aso. Nagpanghikap ang tiguwang sa iyang ulo nga naparok diay sa puthaw dapit sa atop sa PUJ.
Wala tingali mag-inusara pagreklamo ang maong tiguwang kabahin sa kahimtang sa mga PUJ nga nagbiyahean sa lainlaing rota dinhi sa Metro Cebu, labaw na kadtong tua magdagan sa kalungsoran. Unsaon, nagmika lang ang kadagkoan sa Land Transportation Franchising and Regulatory Board (LTFRB) sa ilang tahas nga mao ang pagtan-aw unta nga ang mga public utility vehicles, apil ang mga PUJ, dili maisip nga “running coffins.”
Kumon kaayo natong makita nga daghan sa mga PUJ wala’y mga “head rest” nga aron unta ang mga ulo sa ilang pasahero dili mapantok sa puthaw kon makaagi og libaong ang sakyanan. Bisan gani ang puthaw nga gunitanan sa mga pasahero nga gibutang dapit sa atop sa mga PUJ, angay kining puston og “foam” aron nga kon mapakong ang mga pasahero dili sila masakitan. Kinahanglan usab nga adunay mga sandiganan ang lingkoranan sa mga pasahero aron dili sakit ang ilang mga buko-buko. Apan may mga sakyanan nga natangtang na ang sandiganan ug mao nga mag-antos ang pasahero sa kasakit kon ilamba na sila tungod sa mga libaong.
Samtang nagmika lang ang kadagkoan sa LTFRB sa ila unta nga gimbuhaton, utro pa ang atong mga opisyal sa kagamhanan. Ang atong mga konsehal dako unta kaayo og mahimo kay sila man ang mopanday og mga ordinansahon aron pagtagad niining maong problema, apan wala ra sila magpakabana. Ang rason niini mao nga kanunay ra sila nga nagsakay sa ilang mga luho ug bugnaw kaayong service vehicles sa kagamhanan, ug mao nga wala nila mabatyag ang pag-antos sa mga tawo nga nagbutang kanila sa puwesto.
- Latest