Problema sa ting-ulan

Ting-ulan na ug normal na usab ang mga pagbaha dinhi sa Metro Cebu panahon sa kusog nga pag-ulan, ug puwerhisyo na usab kini alang sa mga Sugboanon, ilabi na niadtong mga trabahador nga anaa nadestino kanunay sa gawas.

Hinuon adunay pipila ka proyekto nga nag-improve sa mga kanal ug sapa sa dakbayan sa Sugbo, Mandaue ug silingan nga mga lugar. Apan ambot kon mosaler pa ba kini’ng mga proyekto batok sa mga pagbaha sa umaabot nga mga adlaw.

Dinhi lang sa dakbayan sa Sugbo, kamulo karon ang pagguhab sa kagamhanan sa siyudad sa usa ka porsiyon sa dalan Colon aron sa paghimo og dako nga drainage ilalom niini. Taas kini nga drainage, gikan pa sa usa ka sapa sa dalan D. Jakosalem.

Bahaanan kini’ng mao nga dapit, sulod sa pipila na ka dekada. Kusog mosaka ang tubig sa dalan basta mobunok na gani ang kusog nga ulan. Kini ang hinungdan sa paghuot usab sa dagan sa trapiko sa maong lugar ug kasilinganan niini.

Tungod kay anaa lang ubos sa among opisina sa dalan Jakosalem kini nga pagbaha, dako gayud nga kahasol kanamo kini’ng maong problema panahon sa ting-ulan. Kini gumikan kay dili kami makalabang sa karsada tungod sa paglapaw sa tubig.

Ang problema mao nga tungod sa kagamay sa kanal kilid sa dalan Jakosalem ug Colon, dali ra nga moapaw ang tubig panahon sa ulan. Gawas sa kagamay sa kanal, barado usab kini gumikan sa mga basura nga gilabay niadtong wala’y mga disiplina.

Ambot kon mosaler ba kini’ng pagbuho ilalom sa karsada batok sa kanunay nga problema sa pagbaha sa maong dapit panahon sa ting-ulan. Maayo unta kon epektibo. Apan ang pangutana kon makasugakod  ba kini sa dakong bul-og sa tubig gikan sa uptown area.

Resulta man gud kini’ng mga pagbaha sa kakulang sa moderno nga sistema sa drainage sa dakbayan ug kinatibuk-an sa Metro Cebu. Hagbay ra kini nga maldisyon kanato nga mga molupyo.

Siguro agta ra’y nasayod kon kanus-a masulbad kini’ng maong sagabal sa publiko matag ting-ulan.