Wala’y sukod nga serbisyo

Dako kaayo og papel ang mga divers sa nagpadayon nga search and retrieval operations sa lawas ni Bien Unido, Bohol Mayor Gisela Boniel sa kadagatan sa Dakbayan sa Lapu-Lapu.

Nasaksihan nako ang ilang wala’y kakapoy nga pagsalom sa dagat aron lang makatabang sa pagkaplag sa lawas sa mayor nga giingong gitambog sa dagat, kansang suspek mao ang iyang bana nga board member sa Bohol.

Sukad sa Day-1 sa retrieval operation niadtong Hunyo 8, wala g’yud moundang ang mga divers, ilabi na ang grupo sa mga volunteer divers nga gipangulohan nila ni Reinero Tatoy ug Emie Bonghanoy. Miabag usab kanila ang mga divers gikan sa Bien Unido.

Apan nadisgrasya ang usa nila ka diver nga si Mel Quiao diha nga nasubrahan kalawom ang gisalom niini ug diriyot na mahutdi og oxygen ang iyang tangke, hinungdan nga kalit kining misulbong sa dagat.

Dinhi naigo gyud sa nitrogen ang iyang lawas kay napakyas man siya sa gitawag nila og safety stop. Ingon niini ka risgo ang kinabuhi sa mga divers.

Hinoon, luwas ra ang naasoy’ng diver human nadali pagdala sa decompression chamber.

Apan bisan pa sa nahitabo, wala kini makapatandog sa kasibot nila sa paghatag sa ilang serbisyo. Kini ang tinuod nga espirito sa bolunterismo.

Unta mahatagan sila og mga kagamitan nga mohaum sa ka delikado sa ilang gimbuhaton. Subo palandungon nga ang mga ekipo nga gamit sa atong mga divers, ulahi kaayo itandi sa mga malamboon nga nasud.

Apan bisan og dili kaayo moderno ang ilang kahimanan, napangitaan nila kini og pamaagi aron makahatag og wala’y sukod nga serbisyo.