EDITORYAL - Kinsa ang tapolan?

Nagtulod-tulod na lang karon ang kadagkoan sa Department of Public Services (DPS) sa Dakbayan sa Sugbo ug ang mga opisyal sa kabarangayan kon kinsa kanila ang angay’ng mabasol sa daghang basura nga dugay kaayong makuha daplin sa karsada. Ang mga garbage collector sa barangay moingon nga kadtong mga basura nga anaa daplin sa main road, katungdanan sa DPS ang pagkuha niini, samtang ang kadagkoan sa DPS moingon usab nga gipagamit nila og garbage truck ang mga barangay aron sila na ang mohakot sa basura sa ilang dapit.

Kanunay gyud nga magbuntaog ang mga basura daplin sa Salvador Street gikan sa eskina V. Rama Avenue paingon na ngadto sa Barangay Labangon. Punoan sa dakong kahoy diha sa kilid sa Kapitolyo kanunay’ng magtipun-og ang basura matag buntag. Laing mga pundok sa basura sa unahan sa eskina Andres Abellana Street. Kanunay usab nga magpundok ang basura duol sa entrance sa One Pavillion. Laing pundok sa mga basura duol sa eskina sa Alliance of Two Hearts sa Banawa, ug mas dako nga bungtod sa basura sa eskina sa Forest Hills.

Ngano nga dili man gyud sayohon ang paghipos sa mga basura aron inigkabuntag limpyo na ang atong barangay, ug sa kinatibuk-an, ang atong siyudad? Dili pa kaayo traffic sa buntag ug higayon na unta nga madali ra ang paghakot sa mga basura paingon sa transfer station sa Barangay Inayawan. Kon ingon niini ang kanunay’ng makita sa katawhan, anam-anam sila nga motuo nga dili takus si kanhi konsehal Roberto “Bob” Cabarrubias nga modumala sa DPS.

Sa kapin sa tuig na nga pagdumala ni Cabarrubias sa DPS, angay’ng ilhon na niya kon kinsa ang mga ligoy nga garbage collectors ug ilisan sila. Daghang nanginahanglan karon og trabaho nga ikapuli sa mga tapolan. Unta, mauwaw si Mayor Tomas Osmeña nga magtan-aw nga magkatap ang mga basura sa kadalanan.