“Happy birthday Dada!”

“Eat and run” kini ang kinabuhi sa mga tawo nga kanunay magdali tungod kay dunay giapas nga deadline diin usa na ako niana isip usa ka tigbalita nga kanunay makigginukdanay sa oras aron lang ma-file ang balita sa gitakda nga oras.

Panahon sa tingkaon o paniudto kanunay mapasahan sa gutom o kon makakaon man apan kanunay magdali dali kay naay giapas nga schedule sa coverage.

Sukad sa nakalabay’ng semana ako ang naka-assign sa pag-cover sa search and retrieval operation sa lawas ni Bien Unido Mayor Gisela Boniel sa kadagatan sa Lapu-Lapu City.

Mangadlawon ko pirmi aron dili mabiyaan sa Sea Ambulance nga gigamit sa mga otoridad didto sa lawod.

Makabalik ang team sa pantalan hapon na diin kami sa akong news team magkapuliki aron makapahigayon sa among live report.

Mogikan ko sa balay alas- 4 sa kaadlawon alang sa trabaho ug makapauli sa balay alas 8 na sa gabii niining special coverage namo.

Kagahapong adlawa namawi ko sa akong pamilya kay day-off man nako nangadlawon sad ko sa pagpangompra sa merkado palit lab-as nga isda ug kinhason ug makahigop og lamian nga sabaw.

Pag-uli nako nakamata na ang akong 3- anyos nga anak nga si Francis John Paul nga misugat sa pag-ingon “HAPPY BIRTHDAY DADA”, nikatawa ang akong eldest nga 11-anyos nga si Keizia nga nagkanayon “dili Paul oi, father’s day man gud...”

Pagkanindot gyud paminawon ang pulong sa mga anak nga mopadayag sa ilang pagmahal nato nga mga gini kanan.

Ang pagkaamahan dili lang kutob sa paghatag sa mga materyal nga butang kon dili sa walay sukod nga pagmahal ug gugma sa pamilya labaw sa 24/7 forever!