Brgy Poblacion, Madridejos, Cebu

“Naunsa na man intawon kining among paradahan sa sakyanan diri sa lungsod nga kun mag-uwan magpundo man ang tubig nga daplin ra man unta ni sa karsada. Sige ra man og saad ang mayor nga ipaayo, pero wala pa man gihapon.”

Brgy Tungkop, Minglanilla, Cebu

“Naa lang kami problema sa drainage diri dapit sa Sister of Mary Boystown kay moawas na ang tubig sa likod kun mag-uwan kay wa’y klarong kanal nga kaagian sa tubig. Dugay na man unta kini nga problema, pero mga opisyal wala may pakabana.”

Brgy San Isidro, Talisay City

“Diri sa Sitio Mahayag ang basura dugay kaayo kuhaon sa mga garbage collector, mabaho na lang gud. Asa na man ang mga gisuweldohan sa gobiyerno para tigkuha sa mga basura?”

Brgy Tayud, Liloan, Cebu

“Akong panawagan sa mga polis nga aksyonan unta nila ang problema sa illegal swertres ug shabu diri sa among barangay. Duda namo, naay koneksyon sa mga opisyal sa barangay ang coordinator sa illegal swertres diri.”

Brgy Talisay, Santander, Cebu

“Maayo unta og ang bag-ong hepe sa kapolisan diri sa among lungsod nga mohimo na og aksyon sa problema sa illegal drugs kay ang kanhi hepe wala may pakabana sa problema.”

Brgy Lamac, Consolacion, Cebu

“Naay magsugal og tong-its diri nga magbuntagay. Naa ni dapit sa parkinganan sa mga habalhabal. Maayo unta og naay himoong aksyon ang kapolisan bahin niini ug sa mga opisyal sa barangay para mahunong ang sugal.”

Brgy Pusok, Lapu-Lapu City

“Naproblema gyud kami nga mga nagpuyo diri sa Sitio Matumbo kay wa’y klaro nga agas sa tubig. Naay panahon nga sa usa ka buwan moagas lang og kausa o kaduha  ug mawagtang usab dayon. Mag-agwanta intawon kami og timba sa atabay.”

Brgy Pili, Madridejos, Cebu

“Ako lang ireklamo kining mga nagtapok nga mga bugas nga naa gibutang sa Kota Park. Daghan na man ni kaayo pero ngano nga wala man ipanghatag ngadto sa mga nagkinahanglan? Adto na ba nila kini ipanghatag kon mangabaho na?”

Brgy Maribago, Lapu-Lapu City

“Kining lugar nga Sitio Ka Emang, naay nagpuyo diha nga mga babaye nga maoy namaligya’g shabu diha sa Datag, likod gyud sa eskwelahan. Dugay na man unta kini namo gisumbong sa mga polis, pero wala’y aksyon nga gihimo.”

Brgy Ibo, Lapu-Lapu City

“Kining luyo sa barangay hall sa among lugar mas maayong susihon kini sa kapolisan kay naa kami mabantayan diha nga namaligya’g shabu. Dali gyud siya mahibaw-an sa iyang pagpamaligya kay ilado kaayo kining tawhana diri, idlas kaayo mura’g naay nagpaluyo.

Alang sa inyong mga reklamo text lang sa 09083006702