EDITORYAL - Narco-ISIS?

Makaalarma kining pamahayag ni Presidente Duterte ug ni PNP Chief Ronald dela Rosa nga gisuportahan og kuwarta ug bala sa mga narco-politicians ang Maute Terror Group nga niatake karon sa Marawi City. Si Dela Rosa wala hinoon mobutyag sa mga pangalan ug kon pila ka mga narco-politicians ang nalambigit, apan giingong gikan sila sa Mindanao ug adunay uban nga gikan sa Metro Manila.

Nagpasabot kini nga ingon sa gihalangan og maayo kining mga sindikato sa ilegal nga drugas sa kampanya sa gobiyerno batok kanila ug ilang gigamit ang mga terorista aron mohimo’g kagubot. Makaalarma kini kay abunda og kuwarta kining grupoha samtang ang mga local terror groups, wala’y pundo gawas lang sa Abu Sayyaf nga nakatigom na og milyones pesos gikan sa ilang kidnapping for ransom nga modus.

Sumala pa nga ang pag-atake sa Maute sa Marawi City kabahin sa mas dakong plano nga mao ang pagtukod sa Islamic State sa Southeast Asia ug himoon nila nga kapitolyo o sentro ang maong siyudad. Kining pagdeklarar og martial law sa Mindanao ug pagsuspenso sa Writ of Habeas Corpus didto, makapadali sa mga otoridad pagsikop niining mga narco-politicians.

Ang ISIS nipatuman og radikal nga interpretasyon sa Islam nga wala mauyoni sa mas kinabag-ang mga Muslim sa kalibutan. Apil sa ilang gidili kining mga bisyo. Apan ngano nga naapil man ang mga narco-politicians sa ISIS? Dili angay kalimtan nga kining mga tawhana gikan sa mga political clans ug may inpluwensya sa ilang mga dapit. Aduna sila’y pundo, kon tinuod man nga nalambigit sila sa ilegal nga drugas, nga magamit sa maong teroristang grupo.

Gamiton sila aron makaestablisar ang ISIS sa ilang gusto dinhi, apan sa kadugayan unayon ra sila niini. Apan ang Mindanao mosamot og kaut-ot tungod kanila. Busa, maayong suportahan ang gobiyerno kontra sa ilang mga gipanghimo, mentras sayo pa. Mas maayong makural lang sa Mindanao ang kagubot ug dili moabot sa ubang bahin sa nasud.