EDITORYAL - Ayaw isakripisyo ang edukasyon

Magsugod na karong Hunyo 5 ang klase sa tanang pangpublikong tunghaan dinhi sa nasud. Ang DepEd mipahibalo nga magsugod gihapon sa maong petsa ang klase sa mga eskuylahan didto sa Mindanao, bisan pa man og ang maong dapit gideklarar nga ubos sa Martial Law. Sa mga lugar nga gawas sa Marawi City ug sa Lanao Del Sur, mahimo ra tingali kini nga buhaton. Husto man ang DepEd kay dili puwede nga mabalda ang edukasyon sa kabataan, ilabi na sa mga lugar nga wala’y kasamok nga nahitabo. Pagpakita kini nga bisan sa pagpanghulga, dili angay’ng magpadala ang katawhan sa gusto sa mga terorista nga mabuhi sila ubos sa kahadlok, kay kun mao kini ang mahitabo, daw gitugotan nato nga nakadaog ang mga terorista.

Apan kinahanglan tingali nga maghimo og espesyal nga pagpangandam sa Marawi City ug sa kalungsoran sa Lanao del Sur tungod kay dili mga rebelde kining mga kaaway karon sa gobiyerno, kun dili, mga terorista. Wala sila’y laing tumong, kun dili, ang pagtisok og kasamok, kahadlok, pagpatay ug paghimo’g mga linuog nga krimen. Dili siguro husto nga ilawog ang kabataan ug mga magtutudlo ngadto sa mga terorista.

May mga magtutudlo kaha nga motungha nianang mga petsaha, o aduna ba kaha’y mga ginikanan nga mopaeskuyla sa ilang mga anak samtang nagpadayon pa ang gubat nga nahitabo karon sa Marawi City? May pamahayag ang DepEd nga dili na ipagamit ang mga eskuylahan isip evacuation centers. Mahimo kini sa gobiyerno, apan luwas ba kini gikan sa pag-atake? Mas maayo nga maghimo og laing preparasyon ang DepEd alang niini kay dili usab mahimong mohunong na lang pagtungha ang mga bata tungod sa kagubot. Dili angay’ng isakripisyo ang edukasyon kay mao ra kini ang paagi aron mahunong kining kagubot sa Mindanao.