EDITORYAL - Maghiusa batok terorismo

Sa makausa pa, kinahanglang mahimong responsable ang publiko ug labi na ang mga netizens sa ilang mga ipang-post sa social media bahin niining mga nahitabo sa Marawi City. Daghang nanggawas nga mga balita bahin sa pag-atake sa mga teroristang Maute ug Abu Sayyaf nga gawas ug nagpagkita sa makaluluoy nga sitwasyon sa mga inosenteng sibilyan, Muslim man o Kristiyano, ug nagsabwag usab og bakak nga mga balita, kahadlok ug kasamok.

Ang gobiyerno ug ang kadagkoan sa Simbahan ug mga Muslim community, nanawagan sa publiko nga hunongon kining pag-post ug pag-share og mga bakak nga balita nga makapasamot sa sitwasyon ug kagubot bahin sa nahitabo sa Marawi. Adunay mga wa’y lingaw nga nag-post og mga reports nga daw gusto nga ipagawas nga ang nahitabo didto sa Marawi City, away tali sa mga Kristiyano batok mga Muslim. Kining mga tawhana mga iresponsable, ug kinahanglang santaon dayon kun mabasahan ang ilang mga posts.

Wala’y kamatuoran ang maong post kay ang nahitabo sa Marawi City usa ka terorismo ug kriminalidad, ug wa’y labot ang relihiyon. Ang mga lider sa Muslim Community dinhi sa Sugbo sama ni Ustadz  Najib Razul, tsirman sa Metro Cebu Muslim Community miingon nga ang 26 milyones nga mga Muslim dinhi sa Pilipinas nasuko ug nasagmuyo sa gibuhat sa Maute ug Abu Sayyaf didto sa Marawi.

Gani tungod sa ilang kalagot, nipagawas sila og fatwa o kamandoan sa tanang kabataang kalalakin-ang Muslim dinhi sa Sugbo ug didto sa Mindanao nga dili magpahaylo sa propaganda ug interpretasyon sa mga terorista sa ilang relihiyon, dakpon ang si bisan kinsa nga magtudlo og sayop nga pagtulun-an sa ilang relihiyon ug ipalutos sa balaod. Sa samang pamaagi, ang mga Kristiyano mimando sa tanang magtutuo nga iampo dili lang ang nga Kristiyano, kun dili, lakip ang mga Muslim nga nabiktima sa maong pagpangatake. Dili angay kalimtan nga usa ra ang mga Pilipino, Kristiyano man o Muslim, ug dili angay mag-unay.