Brgy Guindaruhan, Minglanilla, Cebu
“Dugay na kaayo kining quary diri sa among lugar, halos kada gabii ang hinakutay sa mga anapog, pero wala’y pakabana ang among mga opisyal sa barangay ug lungsod. Legal ba kaha kini kay delikado ang ilang gihimo.”
Brgy Poblacion, Sibonga, Cebu
“Naunsa na man kining taga lungsod nga sige man og pamadlong sa mga naninda sa eskina nga ginagmay ra man unta ang ilang mga tinda. Estrikto man kaayo sila sa nagtinarong sa panginabuhi, pero mga ilegal gipasagdan lang.”
Brgy Paknaan, Mandaue City
“Grabe na kaayo ang kadaot sa among pagatpatan diri kay dunay nagsige’g tam-ok og anapog nga gipangyabo diha nga gihakot sa mga dump truck. Luoy kaayo ang pagatpatan kay nangadaot na kay gitabunan.”
Brgy Sawang-Calero, Cebu City
“May nabantayan mi nga dunay polis nga nagpuyo diri sa among lugar pero ang among nahibudngan nga kanunay man kini siya makig-estorya sa mga iladong pusher diri nga among mga silingan. Imbes iyang dakpon, gihimo man hinoon nga barkada.”
Brgy Sto. Niño, Malabuyoc, Cebu
“Ako lang ipahibawo sa taga munisipyo, labi na sa taga CEBECO nga diri sa among lugar sa Sitio Danao daghan na kaayo ang nag-illegal tapping sa kuryente. Kami ra ba kuno ang makabayad sa binuang sa uban.”
Brgy Cangdampas, Barili, Cebu
“Moreklamo lang ko bahin niining karsada namo diri sa ubos nga bahin sa balay sa among kapitan nga pwerte na man lang gyud nga lisora agian, labi na kun mag-uwan. Kanus-a man intawon makalingkawas sa sakripisyo ang mga tawo diri?”
Brgy Cabulihan, Toledo City
“Hangtod karon daghan gihapon ang mga namaligya og drugas diri, ingon man ang mga adik. Asa na man intawon ang mga polis ug nganong wala man intawon magpakabana sa problema sa shabu.”
Brgy Maribago, Lapu-Lapu City
“Kining Sitio Looc, dugay na gyud ni namo gisigehan og reklamo kay wala may kasulbaran ang problema sa shabu diri. Naay iladong pamilya diri nga maoy supplier sa shabu pero wala man gyud ni sila dakpa.”
Brgy Lamac. Consolacion, Cebu
“Naunsa na man tawon kining among barangay nga rampant na man kaayo ang ilegal nga drugas, wa’y kasulbaran. Ang giila nga druglord diri sa among lugar mao nga dili dakpon kay ang anak nga babaye, kabit man sa polis sa among lungsod.”
Brgy Kalubihan, Cebu City
“Ako lang ireklamo kining sidewalk sa Sanciangko Street, atbang sa UC Main kay na’ay signage nga nakababag sa agianan ug maglisod na intawon pag-agi ang mga tawo. Asa naman ang taga PROBE, ngano nga ila man kining gipasagdan.”
* * *
Alang sa inyong mga reklamo text lang sa 09083006702
- Latest
