EDITORYAL - Sideline ipaundang

Gidid-an na gyud ang mga garbage collector nga sakop sa Department of Public Services (DPS) sa pagpanigum og bisan unsa nga ilang makuwartahan gikan sa mga basura kay kini maoy makapalangan sa ilang trabaho paghipos sa mga sagbot.

Ang atong editoryal kagahapon nagtuki sa kinaiya sa mga garbage collector nga dugay kaayong makahuman pagkarga sa basura ngadto sa trak tungod kay ma-busy man sila sa pagpangukay sa mga sagbot aron lainon ang ikabaligya pa.

Abtik nga gitigum ni DPS Chief Roberto Cabarrubias ang iyang mga garbage collectors, ilabi na ang iyang mga sinaligan, aron nga did-an gyud ang mga tigkolekta sa basura nga mohimo sila og makapalangan sa ilang trabaho.

Gani gipasalig ni Cabarrubias nga panid-an nila ang mga garbage truck nga mohapit sa mga baligyaanan og mga scrap materials nga sagad baligyaan sa mga garbage collectors sa ilang matigum nga mga lata, plastic, botelya ug mga karton.

Daghan hinoon ang nagtoo nga ang pasidaan ni Cabarrubias nga posibleng matangtang sa trabaho kadtong mga garbage collectors nga dili motuman sa kamandoan, dili kini kahadlokan sa mga hingtungdan kun dili gayud pamatud-an.

Tinuod, luoy usab kaayo ang mga garbage collectors nga mihimo og mga pamaagi aron nga madugangan ang ilang kinitaan. Wala malilong nga dili kaayo dagko ang sweldo sa mga garbage collector sa dakbayan, ug tingali wala gani sila magdawat og hazard pay.

Ang Dakbayan sa Sugbo wala gani tingali maghatag kanila og libre nga butas ug rain coat nga magamit nila panahon nga mag-uwan, kay ang trabaho sa mga tigkolekta og basura dili mohunong kun mag-uwan.

Dili nato mabasol nga mangita og sideline ang mga garbage collector, ilabi na kadtong mga kawani sa barangay, kay ang City Hall wala na man mohatag kanila og dugang honorarium. Aron mohunong na sila sa pagpangolekta og ilang makuwartahan, hatagan sila og gamay’ng benepisyo.