Brgy Cogon-East, Carmen, Cebu
“ Naa untay kasilyas ang merkado namo diri pero gubaon wa gihapoy kapuslanan nagbayad man unta mig ensakto. Ang pultahan kay gubaon hasta ang agasanan sa tubig kay barado wala gyuy nag-atiman niining problemaha.”
Brgy. Libod, Ronda, Cebu
“ Amo lang unta ireklamo ang gubaon namong karsada diri sa may Upper Libod dugay naman unta kaayo ning problemaha pero wala may nagpakabana nga mga opisyal sa barangay ug sa among lungsod murag wala sila makakita sa problema.”
Brgy. Tabunok, Sogod, Cebu
“ Naunsa na man intawon kining among kapitan diri sa barangay nga gitugotan ra man kining mga nagtukod og poultry farm ug piggery diri sa among lugar. Nag-antos mi sa kabaho ug sa grabing mga langaw labi na gyud diri sa Sitio Suba.”
Brgy Basak, Mandaue City
“ Sir Jun wala man panumbalinga sa mga polis ang tigbakay diri sa Sitio Kanipaan nga unta wala namay fiesta. Naa mi mabantayan nga mga polis nga mosuroy didto pero imbes nga mamadlong sugaton ra man sa tigbantay sa tigbakay unya tunolan.”
Brgy Inayawan, Cebu City
“ Naay video karera machine kilid lang gamay sa kapilya diri sa Sitio Lumboy daghang mga bata ang magduwa usahay magbuntagay pa. Wala man gyud ni dakpa sa mga polis sa Pardo nga kadaghan naman mi mireklamo sa ilang opisina.”
Brgy Pasil, Cebu City
“ Naproblema ang mga tawo diri sa among barangay kay pila na ka adlaw nga wa makolekta ang mga basura kay wala na masweldohi ang mga basurero balig lima ka buwan. Hinaot unta nga maatiman dayon kining problemaha kay kaming mga tawo nag-antos.”
Brgy Buhisan, Cebu City
“ Diri sa Sitio Langub amo lang ireklamo kining kusog kaayong sugal sama sa tong-its matag Sabado ug Domingo daghang mga bana ang maawayan sa asawa kay kanunay pildi. Maayo untag mabadlong kining nagpadagan sa sugal kay makabungkag sa pamilya.”
Brgy Linao, Talisay City
“ Naproblema gyud kaming mga nagpuyo diri sa among barangay kay hapit nalang kada adlaw dunay mahitabong brownout delikado kaayo nga maguba among mga appliances. Kuyaw pa gyud kaayo sa sunog.”
Brgy Bulak, Dumanjug, Cebu
“ Mohangyo lang unta kami sa mga polis sa among lungsod sa hingusgan ang kampanya sa illegal drugs sa among barangay kay daghan man gihapon among mabantayan nga namaligyag shabu unya daghan na sab ang mga adik.”
Brgy Poblacion, Oslob, Cebu
“ Kaming mga taga lungsod dunay concern bahin sa tambal gikan sa Department of Health Regional Office nga para unta diri sa among health center kay imbes mangayo mi dili man hinoon hatagan kay atoa daw sa mayor. Luoy kaayo ang dili kaalyado kay dili hatagan sa libreng tambal.”
* * *
Alang sa inyong mga reklamo text lang sa 09083006702
- Latest
