Buslot sa GrabCar
May reklamo ko sa GrabCar. Nga maoy among gisakyan gikan sa Consolacion paingon sa pinuy-anan sa among higala sa Ma. Luisa Subdivision sa Banilad, Dakbayan sa Sugbo. Nakabantay ko nga ang plitehan nga gitakda sa app niabot og P653.
Gawas nga nagdali, wa ko maglangas kay nagtuong nasayop lang ang app. Sa nangaging mga biyahe sa GrabCar, Uber ug bisan sa kasagarang mga taxi sa samang destinasyon, kapin ra sa P200 ang akong nabayran. Maong nakugang ko dihang pag-abot na namo giingnan ko sa drayber nga P653 gyud diay ang plitehan.
* * *
Gipasabot ko sa drayber nga bag-ong lagda sa GrabCar ang pagpatong og P400 sa naandan nga plitehan kon tungason ang destinasyon sama sa bukirang mga barangay sama sa Busay ug ibabaw mga subdivision sama sa Ma. Luisa.
Niangkon ang drayber nga wa sila pahibaw-a giunsa pagkuwenta ang mas dakong plitehan. Matud niya wa sila konsultaha sa kadagkoan sa GrabCar mahitungod sa kausaban. Nga gihangop hinuon nila kay nagkahulogan man nga mas dako sab ang ilang bahin.
* * *
Nanawag ko sa lokal nga buhatan sa GrabCar aron pagpangayo og dugang katin-awan. Giingnan ko usa sa ilang tigpamaba nga gipatuman nila ang bag-ong lagda tungod sa reklamo sa ilang mga drayber sa kalisod paghatod sa mga pasahero sa tungason nga mga dapit.
Apan siya mismo di kapasabot sa sukaranan sa pagtakda nga P400 ang patong. Giapil bang kahabugon? Gikuwenta ba sab ang gilay-on? Gisukip ba sa kuwentada ang gidaghanon o gidak-on sa mga pasahero?
* * *
Matulisok ko sa kadagkoan sa Land Transportation Office (LTO) ug Land Transportation Franchising and Regulatory Board (LTFRB) nga wa magkuwang sa pagpasidaan nga mahimong kolorum nang among nasakyan kay way pagtugot gikan sa ilang buhatan. Padayon hinuon kong nisakay kay mas sayon ug mas bag-o ilang mga sakyanan.
Mao ni buslot sa Uber ug GrabCar: Sila ray magbuot sa plitehan, pinasikad sa ilang algorithm, di na ikonsulta sa mga pasahero ug di na kinahanglang tugotan sa gobiyerno. Sa among biyahe pabalik, P202 na lay plite. Wa bang kahibawo ang GrabCar nga ang among pinuy-anan mas tungason kay sa Ma. Luisa? O luhong mga destinasyon ray puntirya sa ilang raket?
- Latest
