Shabu dili makaboang

Atubangan sa mga nanambong sa iyang pakigpulong sa usa ka kalihokan sa University of the Philippines si United Nation Special Rapporteur Agnes Callamard miingon nga wala’y ebidensiya nga magpamatuod nga ang shabu makamugna og bayolente nga batasan ug makadaut sa utok. Kining maong pamahayag gibasi usab ni Callamard sa mga sinulat ni African-American Professor Carl Hart.

Kun usa pa ko sa mga nakatambong sa maong pulong ni Agnes Callamard ako gyud siyang pangutan-on dili ba silang duha ni Professaor Carl Hart mga adik. Ang mga eksperto gud sa siyensiya ug mga doktor sa medisina nagkahiusa sa pag-ingon nga makadaut sa utok ang gidili nga drugas nga shabu ug usa sa mga epekto mao ang pagkauga sa utok sa mogamit niini.

Atol sa pulong wala’y gikapakita nga basehanan si Callamard nga maoy gibasihan ni Professor Hart sa pag-ingon nga wala’y ebidensiya nga magpamatuod nga makamugna og kadaut sa utok sa tawo ug bayolente nga taras niini ang paggamit og shabu.

Kay wa man ko didto, wa ko masayod kun gikataw-an ba si Callamard sa mga intellectuals niyang audience sa University of the Philippines. Wa pud ko makahibawo kun mitoo ba sila ni Callamard ug ni Professor Carl Hart.

Kun ibasi nato sa mga pulong ug pamahayag ni Callamard maingon nato nga disipulo kini siya sa dakong sindikato sa ginadili nga drugas sa tibook kalibotan. Kay Special Rapporteur sa United Nation si Callamard maingon nato nga wala mabantayi sa United Nation ang pagsulod sa sindikato sa drugas sa ilang organisasyon.

Sa akong tan-aw si Callamard nagtakoban sa pagkalobo apan diay to malign. Nagpakaaron-ingnon nga nagpakabana sa tawhanong katungod apan tumong ug tuyo diay niini ang paglapas sa matag usa sa ilang tawhanon nga katungod nga mabuhi ug mahatagan og luwas nga katilingban. 

Shabu dili makaboang? Asa ko too!