EDITORYAL - DPS nagmika ra?
Nabantayan karon sa katawhan nga napakyas ang mga garbage collectors sa Department of Public Services (DPS) sa paghipos dayon sa mga basura nga gilabay diha sa daplin sa mga karsada sa Dakbayan sa Sugbo.
Ang trabaho sa mga garbage collectors nga gisweldohan sa kagamhanan sa Dakbayan sa Sugbo mao ra ang paghipos sa mga basura nga gipanglabay sa katawhan daplin sa karsada.
Ang mga garbage collectors sa DPS mohakot niini ngadto sa pribadong transfer station sa Barangay Inayawan nga giabangan sa private hauler nga gikontrata sa City Hall aron hakuton ang basura paingon sa landfill.
Sa ato pa, duol ra unta kaayo ang dapit nga hatdan sa mga basura sa garbage truck sa City Hall, apan nahibulong ang katawhan nganong kanunay man sila nga makakita og nagliundok nga basura nga wala mahakot?
Tungod sa maong talan-awon, dili kalikayan nga ang katawhan magduda nga hayan nagmika ra ang mga tigkolekta sa basura sa ilang gimbuhaton. Usa sa makapalangay sa trabaho sa mga garbage collectors mao ang pagpanghagpat nila sa mga butang nga ilang ikabaligya.
Ingon sa ilang gikompetensyahan ang mga tigpanguykoy og basura nga nagpaabot didto sa transfer station. Ang uban makasabot nga tungod kay dili kaayo dagko og sweldo ang mga garbage collector sa City Hall, maoy rason nga mag-sideline sila pagtigum og ilang makuwartahan.
Apan tungod sa ilang gihimo, masakripisyo ang katawhan nga maoy nagsweldo kanila gikan sa ilang mga buhis kay dugay man nga mahakot ang nagliundok na nga mga basura.
Kini maoy angay unta nga hatagan og pagtagad sa mga opisyal nga nagdumala sa Dakbayan sa Sugbo aron mopaspas ang pagpangolekta og basura sa atong mga garbage collectors.
- Latest