Apektado ang pagtungha

Dili malalis nga peligro gyud ang pagpasakay og bata sa mga motorsiklo, ilabi na ang mga masuso pa. Kun mahitabo nga madisgrasya ang motor ug matumba, luoy gyud tawon ang bata.

Ang uban sab nga mga ginikanan, maglibre lang og ila. Ang Papa nga maoy sagad mag-drive sa motor, naka-helmet, ang asawa nga nag-angkas ug nagkugos sa bata, may helmet sab, apan ang bata, wala’y helmet.

Unsa man ang buot ipasabot niini? Mosugot ra ba mo nga mabuak ang ulo sa inyong anak? Apan kining Republic Act 10666, kon Children’s Safety on Motorcycle Law, daghan ang masakripisyo niini.

Husto si Mayor Tomas Osmeña nga wala makauyon niining maong balaod. Angkunon nako nga sa makadaghan nga higayon, magpasakay ko sa akong bata sa motor, sukad pa kaniadto.

Apan wala gayud mahitabo nga kami natumba kay mabinantayon kaayo ko nga momaneho og motor. Husto ang gikabalak-an ni Tommy nga kun estriktuhon gayud ang pagpatuman niining mao nga balaod, daghang tinun-an ang maapektohan.

Dili ikalimod nga ang motorsiklo maoy sagad sakyan sa mga tinun-an, bisan sa pipila ka barangay dinhi sa siyudad. Ihatod sa mga ginikanan ang ilang mga anak pinaagi sa motorsiklo, labaw na didto sa bukid. Pila ra man gud ang adunay mga four wheels nga sakyanan. Sagad sa mga tawo motorsiklo ra gyud ang maabot. Ang motorsiklo mao ra sab ang madali-dali sa paggamit sa paghatod sa bata sa tunghaan, ilabi na kun magdali.

Apan kay balaod na man kini, wala kita’y mahimo kun ang mga tigpatuman sa balaod – ang Land Transportation Office – manakop gyud sa mga malapason.

Apan sigurado usab ko nga dili kaayo manakop sa mga malapason sa lagda sa Republic Act 10666 ang mga traffic enforcer sa dakbayan karon nga mibuhi na og pamahayag si Mayor Osmeña nga supak siya niini.

Ambot may statistics ba kaha nga daghang bata nga nangamatay o nangaangol tungod sa pagkaaksidente sa motorsiklo nga ilang gisakyan?

* * *

Si Mayor Osmeña nabalaka nga kun hugtan ang pagpatuman sa balaod, maglakaw na lang ang mga bata paingon sa ilang tunghaan? Kalooy pud.

Matud ni Osmeña nga kadtong mga ginikanan nga magpasaka og masuso sa ilang motor, mahimong dakpon, apan ang mga bata nga mopaingon sa ilang eskwelahan, dili na lang gyud estriktuhon pag-ayo.

Angay unta nga unya na mag-estrikto ang kagamhanan kun adunay daghang public utility vehicles nga namiyahe sa mga dapit. Sa ilang gihimo, susama ra nga sakripisyuhon gyud nila ang mga tawo, ang mga ginikanan sa kabataan.