EDITORYAL - Rule of law ang ipatigbabaw

Bag-o na unya ang kalihim sa DILG sugod karong Hunyo 2. Si AFP Chief of Staff General Eduardo Año karon pa untang Oktubre moretiro sa serbisyo, apan gusto na ni Presidente Duterte nga molingkod na kini isip DILG Secretary. Ang maong ahensya nawagtangan og pangulo dihang gitangtang sa presidente si Ismael Sueno tungod sa pasangil nga kurapsyon.

Ang PNP mahimo na unya nga ubos sa pagdumala ni Año, apil na ang mga abusadong polis. Naputos karon og mga pagsaway ang PNP tungod sa isyu niining mga extrajudicial killings ug dugoon nga war on drugs  sa nasud. Misaad hinoon si Año nga ipatigbabaw gyud ang rule of law sa iyang pagdumala.

Sa pagkakaron, estorya pa lang kini ug wala pa mahitabo, tan-awunon pa kun iya ba gyud nga mahimo. Apan husto siya, mao kini ang kinahanglan niyang unahon aron mabalik ang kompiyansa sa mga tawo nga karon nagduda nga rule of the gun maoy nagpasulabi, ug dili ang tinarong nga pagpatuman sa balaod.

Sa pagsugod sa Oplan Tukhang, daghan kaayo ang nalipay apan dihang nidaghan ang mga kaso sa mga nangamatay sa police operations ug mga kadudahang sirkumstansiya sa kamatayon sa mga drug suspects, daw gilad-angan na ang mga tawo. Dugangan pa nga adunay mga polis nga gihimong panguwarta ang kampanya kontra ilegal nga drugas, nabalik na usab ang pagkawala’y salig sa mga tawo sa PNP. Nindot nga daghan na kanila ang nadakpan apan aduna pa’y daghan nga kinahanglang pangitaon ug lutoson.

Isip DILG secretary, si Año usab maoy mangulo sa Bureau of Fire Protection, Bureau of Jail Management and Penology, ug sa Local Government Units. Lahi na kini nga kalibutan nga naandan ni Año, apan mag-ampo na lang ang katawhan nga sa iyang pagdumala sa DILG mahibalik sa hustong dalan ang ubang nangasaag nga kapolisan.