Banat ( Leaderboard Top ), pagematch: 1, sectionmatch: 1

Sportsfest sa BFP

Usa ka sportsfest ang pagahimoon sa Bureau of Fire Protection (BFP)-7 pinangulohan ni Senior Superintendent Samuel Tadeo isip tipik ug kabahin sa kapistahan ni St. Florian, sa patron sa kabomberohan.

Usa usab sa mga tumong ug tuyo sa maong sportsfest ang pagpalambo sa relasyon sa atong kabomberohan ug gi-promote pud niini ang ka importante sa kahimsog sa panglawas.

Himoon ang maong sportsfest sunod semana ug daghang kalihukan ang giandam, sama sa basketball, volleyball, loan tennis ug uban pa. Sigurado nga makalingaw tan-awon ang maong kalihukan sa atong kabomberohan.

Alang niadtong buot mosaksi ug gusto nga ilang makita ang atong kabomberohan nga nagduwa, bukas kini ngadto sa publiko. Pagahimoon ang sportsfest sa Naga City, Cebu sports center.

Sa pikas bahin, gisugdan na ang Novena Mass alang sa pagpangandam sa atong kabomberohan sa kapistahan ni St. Florian nga anha pagahimoa sa St. Florian chapel sa BFP-7 compound.

Giawhag ang publiko sa pag-apil sa espirituwal nga kalihukan sa atong kabomberohan ug unta hatagan kami og panalangin ug proteksyon ni St. Florian nga sa matag tubag namo sa alarma wala unta’y disgrasya o ba kaha dautang mahitabo kanamo, ug lakip na usab sa mga biktima sa sunog.

Ipahigayon usab sa labing unang higayon ang Flores de Marias diin magparada kining mga pinili nga sakop sa kabomberohan sa adlaw sa kapistahan ni St. Florian karong Mayo 28.

Bisan og magpahigayon og sportsfest ang atong kabomberohan, wala kini magpasabot nga ang tanang bombero musalmot niini. Duna gihapo’y mga bombero nga padayong mag-duty diha sa lainlaing fire stations ug andam nga moresponde kun may sunog.

  • Follow Us: