BRT vs. mga kahoy

Samtang dako ang atong pasalamat sa mga nananom sa kahoy, 50 to 100 years ago, kay lagi dili matukib ang mga kaayohan nga nahatag niini nganhi kanato karon. Apan, wala sila magdahum nga muabot ang panahon nga ang maong mga kahoy ma-irrelevant na, mahimo na nga babag sa kalamboan.

Kun duna man sila’y mga panglantaw, mura’g kutob ra sa tumoy sa ilang makita. Wala sila makakita unsa’y mahitabo sa Sugbo 10, 20, 50 ka tuig gikan sa ilang pagtanom sa mga kahoy. Nagtuo sila nga mapabiling sityo o barangay ang Sugbo.

Karon ang wala nila damha nga mahitabo, nahitabo na. Unsaon man ni nato ang mga kahoy nga ilang gitanom? Atong pugngan ang kaugmaran pabor sa maong mga kahoy?

Nagpaabot kita’g mga dako ug massive nga infrastructure nga kaugmaran sa atong dakbayan ug lalawigan sa Sugbo. Unsa man, dili nato ilahos ang 3rd bridge, ang BRT, ang LRT, ang expressway, ang transaxial highway, ang mga tunnel ug overpass, ug ubang higante nga  kaugmaran tungod ug alang sa mga kahoy?

Mahitungod sa BRT, giingon nga gikinahanglan kuno ang approval sa barangay una maputol o mabalhin ang mga kahoy. Mo’y gidangat!  Sayud man ta nga init kaayo ang politika sa atong dakbayan. Mura’g kada adlaw ang eleksiyon.

What kun ang barangay identified o sympathetic sa Team Rama, mosugot kaha sila nga putlon o ibalhin ang mga kahoy to give way sa BRT nga buot ipatuman ni Tomas?  Ato ba nga masabot nga dili madayon ang BRT kun dili mosugot ang hingtungdang mga barangay pagpamutol sa mga kahoy?  

Ang akong sabot, dili kay pagsulbad ra sa traffic congestion ang tumong sa BRT. Dugang niini, kaminosan ang air pollution, makalingkawas na kita sa smoke belching nga mga PUJ … sa  ato pa, good for our health. Supak ba ang atong mga environmentalist niini tungod lang kay dili sila buot nga hilabtan ang mga kahoy?

By the way, sila ra ba ang nahigugma sa mga kahoy? Sila ra gyud? Ug ingon ba niini kainit sa ilang gugma, to the extent nga dili idayon ang BRT, kay dili na kita makapalapad sa kadalanan?

Concerned kitang tanan niining proyekto sa BRT. Magtinabangay ta. Together mangita kita’g paagi nga mo-coexist ang development ug ang environment. Dili man tingali pamutlon ang mga kahoy, lukahon kini ug ibalhin sa laing dapit … kining ilang gitawag nga earth balling. So, safe gihapon ang mga kahoy.

We, too love the trees!