Banat ( Leaderboard Top ), pagematch: 1, sectionmatch: 1

Dinalidali nga buotbuot

May sukaranan ang pagtunglo sa mga aktibista sa kadalanan sulod na karon sa pila ka dekada sa mga kundisyon nga gipahamtang sa World Bank (WB), International Monetary Fund (IMF) ug ubang mga institusyon bugti sa ilang pagpautang sa kabus nga mga nasud sama sa Pilipinas.

Kay abunda ang mga ebidensiya nga ang binilyon ka dolyar nga ilang gipautang gawas nga napakyas sa pagpalambo sa nabangkarota nga mga ekonomiya nipasamot pa hinuon sa kalapad sa katimawa sa katawhan, ug dili lang tungod sa pangurakot sa mga tagdumala sa nangutang nga mga nasud.

* * *

Inay laslasan, padayon nga gipun-an sa WB, IMF ug ubang mga institusyon ang dili makiangayon nga mga kundisyon. Pipila sa mga kundisyon sa langyaw’ng mga utang nga nakapaut-ot labi na sa mga kabos:

Pagpabiling ubos sa suholan sa mga mamumuo sa pribadong mga kompaniya ug mga kawani sa gobiyerno;

Paglaslas sa tinuig nga nasudnong budget sa kanasuran; ug

Pagpatuman og lapad nga pagdaginot sa mga gastohan gikan sa nasudnong panudlanan.

* * *

Nikumpisal na karon ang kadagkoan sa mga institusyon nga napakyas ang ilang pautang sa pagpalambo sa mga ekonomiya sa utangan nga mga nasud. Gani, kasagaran sa mga biktima nagbalikbalik og pangutang kay nisamot hinoon ang kalisud.

Giangkon sa mga institusyon nga ang labing dagko nilang sipyat mao ang kapakyas sa (1) pagsusi sa aktuwal nga kahimtang sa nangutang nga mga nasud, (2) pagkonsulta sa mga tagdumala sa nasudnong mga ekonomiya ug (3) pagpahaom sa mga kundisyon sa dinaliang mga panginahanglan sa kinabag-an sa populasyon.

* * *

Ang kalaksot sa agi sa WB, IMF ug ubang mga institusyon, dili hinoon makatabon sa kabinuang sa pagsalikway ni Presidente Rodrigo Duterte sa mga hinabang sa European Union (EU) tungod lang sa ilang pagsaway sa iyang gubat sa drugas.

Ang pagbisto ni Socioeconomic Planning Secretary Ernesto Pernia nga wa matuki sa gabinete ang isyu nagmatuod nga dinalidali ug buotbuot ang iyang pag-umol sa desisyon.

Kay bisan unsaon niya og pamalikas, dili malalis ni Duterte ang kamakiangayon sa nag-unang mga kundisyon sa hinabang sa EU alang sa Pilipinas ug ubang kanasuran: Ang pagpatigbabaw sa demokrasya, rule of law ug tawhanong katungod; ug pagsalikway sa silot sa kamatayon.

* * *

(leo_lastimosa@abs-cbn.com)

  • Follow Us: