Banat ( Leaderboard Top ), pagematch: 1, sectionmatch: 1

EDITORYAL - Maayong daghan kay sa kuwang

Nagkinahanglan kaayo ang gobiyerno og pundo aron mapadayon ang peace efforts didto sa Mindanao, ug natubag ang uban niini pinaagi sa international community. Sama sa nangaging mga presidente, nilihok si Duterte sa politikal nga aspeto pakignegosasyon sa mga rebelde didto sa Mindanao ug nangita usab siya og mga mahimong katimbang alang sa pagpabarug pagbalik sa biya sa kagubot.

Kini iyang nakita sa China nga misaad og bilyones ka pesos nga pautang alang sa gikinahanglan sa administrasyon pagpadagan sa nasud ug sa pagtabang sa Mindanao. Apan nganong ipahunong man ang pagdawat og hinabang gikan sa European Union? Aron lang ba ipakita nga independente kita sa impluwensya sa uban?

Tungod lang ba kay manghilabot ang EU sa internal affairs sa nasud samtang ang China dili manginlabot? Ngano, aduna ba’y maayong human rights record ang China? Dili unta kalimtan nga ang pundo sa EU nga gibubo diha sa Mindanao Trust Fund, nakatabang sa kinabuhi karon sa mga rebelde ug sa mga tawo didto nga kapin lima ka dekada na nga nabiyaan pinaagi sa peace building programs sa gobiyerno. Hinoon, sumala pa sa mga opisyal sa administrasyon, makabenepisyo kita sa gipautang sa China ang maong isla. Apan dili ba mas maayong pun-an inay nga ibanan? Usa pa niini, dili negosyo ang tumong sa EU, kun dili, pagtuman lang sa international commitments sama sa pagsiguro nga panalipdan ang human rights, kalinaw ug uban pa, samtang ang China ganansya ug impluwensya ang tuyo dinhi.

Pinaagi sa EU, UN ug ubang organisasyon sa international community, natabangan ang gobiyerno ug ang mga lider sa mga rebelde nga mamentinar ang kalinaw didto pinaagi sa mga inprastraktura, pagpalambo sa basic services ug opurtunidad sa tanan. Pasagdan na lang unta ang EU nga mobahad-bahad, total dili man gihapon madala niini si Duterte. Samtang wala pa unta mohunong ang EU paghatag og pundo sa Pilipinas, dawaton ra unta kini kay mas daghan man ang matabangan sa Mindanao.

  • Follow Us: