Banat ( Leaderboard Top ), pagematch: 1, sectionmatch: 1

EDITORYAL - Epekto sa fake news

Fake news. Mao kini ang nagpasulabi karon sa mga social networking sites nga gipasa-pasahan sa mga netizens nga wala magtug-an sa kung unsay tinuod aron dauton ang usa ka indibidwal o grupo aron maserbisyohan ang interes sa tawong gidapigan sa mga naghimo niini.

Kaning fake news maoy nagbutang karon sa nasud sa sitwasyong gikahimutangan niini. Tinuod adunay mga maayong resulta apan nakuha kini gumikan sa pagpangilad gamit ang fake news.

Ang The Freeman ug Banat News milusad og ad campaign sa social media nga #NoToFakeNews aron pasidan-an ang mga netizens bahin niini.

Daghang gipasapasang fake news sa social media ilabi na sa Facebook nga nagpakita og mga matud pa kahiwian sa mga opisyal sa gobiyerno .

Kaning fake news gigamit aron kondisyonon ang hunahuna sa mga makabasa alang sa umaabot nga sunod nilang aksyon batok sa tawo o sa grupo nga ilang gipuntariya, depende sa mogawas nga opinyon sa mga tawo.

Kasagaran sa mabiktima niining mga fake news mabutang sa posisyon nga magsige na lang og panagang. Panagang nga dili makasalbar tungod sa kadaghan na sa mga negatibong opinyon nga manggawas batok kanila. Daghang mga indibidwal ang nangapriso tungod sa fake news nga giselyohan sa opinyon sa mga tawo base sa ilang gibasa nga katuohan tan-awon.

Katunga sa fake news tinuod, apan ang katunga pulos bakak o wala gyud nila iapil aron di maghunahuna ang makabasang netizen.

Makaluluoy ang mapuntariya sa fake news ilabi na kun naka-generate na og opinyon gikan sa mga tawong way panahon aron manukiduki sa lintunganay sa isyung   gipasangil ngadto sa target. Bisan sa kapaspas sa pagkuha og impormasyon karon mas natapolan ang mga tawo manukiduki  apan dali ra kaayo silang motuo sa fake news nga giladlad nga daw tinuod.

Ang  tinuod nga balita gikan sa mga lehitimong media outlets mas balanse. Kay mohatag og kagawasan ang nakabasa o nakadungog paggamit sa iyang alimpatakan paghinuktok kun unsay husto.

  • Follow Us: