EDITORYAL - Dili makatabang

Gisaway ug gitawag ni Senador Alan Peter Cayetano nga wa’y kabangkaagan sa human rights , extra-judicial killings ilabi na sa problema sa ilegal nga drugas, ang UN Human Rights Rapporteur nga si Agnes Callamard. Si Callamard kalit nga niabot sa nasud sa miaging semana nga wala magpahibalo hinungdan sa kasagmuyo sa administrasyong Duterte.

Si Callamard miklaro nga wala siya nianhi dinhi aron mohimo og konklusyon o imbestigasyon kalabot sa extra judicial killings ug sa war on drugs sa gobiyerno kay nitambong ra siya sa academic conference bahin sa isyu sa ilegal nga drugas. Unsa may ikalain adto? Ngano nga mikisikisi man og maayo si Cayetano ug karon nagduda na siya nga dili na patas ang pagtan-aw ni Callamard bahin sa isyu?

Mura ba og gipasanginlan niya ang top UN Human Rights expert nga dili kini haum moimbestigar sa isyu sa human rights violations. Natural kini nga reaksyon ni Cayetano kay ang gireklamo ang gobiyerno man nga iyang girepresentahan. Dili man baya ni isyu kabahin sa kun pila ang nangamatay o kabahin sa ilegal drugs, kun dili, kabahin kini sa tawhanong katungod  nga unta giprotektahan sa gobiyerno isip signatory sa human rights. Hasta ang Commission on Human Rights iyang gisaway kay naghatag og “alternative facts.” Unsa man diay gusto ni Cayetano, ang tuohan mao lang ilahang listahan kun pila gyud ang nangamatay?

Dili na lang paminawon ang tiyabaw sa mga pamilya sa mga nangamatay, ilabi na kadtong mga inosente nga nabiktima sa mga abusadong polis nga posibleng nangawarta pinaagi sa war on drugs? Husto na kadto nga gipresentar ni Cayetano ang habig sa Pilipinas sa Geneva. Ang pamersonal ni Cayetano kang Callamard dili makatabang sa imahe sa administrasyong Duterte. Ang mismong U.N. high commissioner on human rights miila kang Callamard sa iyang taas kaayong kasinatian sa human rights and humanitarian work ug imbestigasyon sa 30 ka nasud. Butang nga wala ni Cayetano.