Pahunonga aron wa’y duda

Wa gyud gihapon moundang sa pagkawot og yuta ang ARN Builders sa Barangay Binaliw aron maporma ug mahimo ang usa ka sanitary landfill. Aron dili mahibaw-an, gitago sa ARN Builders ang ilang operasyon pinaagi sa pagkubkob sa yuta panahon sa kagabhion.

Apan bisan pa man, dili matago sa katawhan sa barangay diin gikubkob ang yuta tungod sa kasaba sa mga bug-at nga ikipos nga gigamit sa pagkubkob sa yuta ug ang kasaba sa mga sakyanan nga molabay sa ilang dapit nga naghakot sa mga kinubkob nga yuta.

Ang operasyon sa ARN Builders wala’y permiso sa Barangay Binaliw diin anaa tukora ang sanitary landfill. Wala usab kini Environmental Compliance Certificate (ECC) gikan sa Environmental Management Bureau ug sa Cebu City Hall.

Kini ang hinungdan nga sa ako na nga giingon sa lindog nako sa miaging Martes, giisyu ang Cease and Desist Order sa EMB ug konseho sa Barangay Binaliw. Ang Cebu City Hall wala pay hukom sa operasyon sa ARN Builders. Ang pagpakahilom sa Cebu City Hall sa ilegal nga paghimo og landfill nakapalig-on sa pagduda nga si Mayor Tomas Osmeña ang lig-on nga pader nga gisandigan sa ARN Builders.

Dinhi akong gihagit si Mayor Osmeña sa pagpahunong sa ilegal nga operasyon sa ARN ug pamatud-an nga sayop ang mga pagduda nga siya ang pader nga gisandigan sa ARN Builders.

* * *

Hagiton usab nako ang mayor nga ipakita sa nasud ug sa kalibotan nga angayan gayud nga makadawat ang dakbayan sa Sugbo ug pasidungog gikan sa Department of Environment and Natural Resources gumikan sa maayong mga programa sa pagdumala sa kalikupan atol sa gipahigayong national conference sa sharing of good practices and presentation sa Asean Model Cities Phase III didto sa Dipolog City niadtong Marso 30.