Kinsa ang nagpaluyo

Gipadayon sa ARN Builders ang pagtrabaho sa Sanitary Landfill sa Barangay Binaliw, Dakbayan sa Sugbo bisan pa man sa Cease and Desist Order (CDO) nga gipagawas sa Konseho sa Barangay ug sa Environmental Management Bureau sa Department of Environment and Natural Resources 7.

Sigun sa estorya ang Barangay Binaliw mihatag og Barangay Clearance sa ARN Builders tungod kay recovery facility ang ilang himoon. Pero sa iyang gipangayo nga environmental compliance certificate (ECC) sa Environmental Management Bureau, ang rason kay alang sa usa ka sanitary landfill. Bisan walay ECC misugod dayon sa pagtrabaho sa landfill ang ARN Builders hinungdan nga kini gipaundang.

Ang Binaliw Sanitary Landfill nabulgar sa publiko human mireklamo ang pamilyang Englis kay naapil sa pagbungkag sa ARN Builders ang tulo ka ektarya nilang yuta nga nahimutang sa maong dapit. Ang mga Englis nga nagpuyo sa Talamban nakurat pagkakita sa ilang yuta sa Binaliw nga wala na mahitsura.

Ang pagsupak sa ARN Builders sa CDO nga gipagawas sa Barangay Binaliw ug EMB, buhing kamatuoran sa lig-on nga pader nga gisandigan niini. Sigun sa hunghong sa akong amigong duwende, dumadapig ni Mayor Tomas Osmeña ang dako og gibubo nga puhonan sa Binaliw Sanitary Landfill.

Kining maong negosyante dumadapig usab ni Presidente Rodrigo Duterte ug mao ang koneksyon ni Mayor Osmeña ngadto sa presidente. Pero dili siya ang Presidential Assistant nga si Michael Dino. Sigun sa duwende, ang yuta nga nakawot sa gihimong sanitary landfill gilabay sa lungsod sa Cordova ug ang mga bato gipino sa dapit nga gipanag-iya sa kanhi taas nga opisyal sa Barangay Talamban nga kaalyado usab sa mayor.

Ang sanitary landfill ba sa Barangay Binaliw ang nagpaluyo o hinungdan nganong wala gayud mosugot si Mayor Osmeña nga ilabay ang basura sa dakbayan sa Sugbo ngadto sa sanitary landfill sa lungsod sa Consolacion?