Ang senaryo sa trapiko (1)

Sigun sa makita nato sa TV, didto sa kaulohan bisan dinhi sa dakbayan sa Sugbo, maoserbahan ang sitwasyon sa kadalanan, nga managsama gayud ang kinaiya sa pagmaneho og sakyanan.

Matental sa pagtipas sa laing linya kun sabton nga makalusot bisan og apiki sa lugar, mao nga makamugna og trapik.

Ang lagpad didto nga kadalanan nga dunay 6-8 ka  lanes, usahay magubot sa mga sakyanan nga nabulabog kay ang mga drayber dili paalkanse sa pag-inilogay nga madali. Tawo ra ang nagmaneho sa mga sakyanan, nga nagbaton og kalkulasyon nga limitado, usahay mosipyat nga maoy sagad hinungdan sa mga disgrasya.

Kun kita magmaneho’g sakyanan, kanunay alerto sa kortisiya o morespito sa sistema sa trapiko, kanang mapanagan-on o ‘defensive’ nga istelo sa pagdala sa sakyanan. Kun ang hunahuna permi arangkada o  offensive driving susama ra nga nanghagit kita’g problema sa disgrasya nga maka-opaw sa pagpangawot sa ulo.

Gikinahanglan ang pagsinabtanay sa pagsubay sa kadalanan kay kita ra ang maunay nga mahasol sa purhisyo sa trapiko. Dili kita molugak sa kompiyansa, nga mopahimulos sa tsansa, nga maghatag sakit sa ulo. Pabugnawon ang ulo nga pasensyoso diha sa dalan. Ayaw irisgo sa pamasin ang atong pagmaneho.

Mabinantayon sa tanang higayon kay malisud na nga masugamak kita sa pagmahay tungod sa atong pagpasagad, nga ingon sa mohawod sa kadalanan. Kun ingon gyud niini ang marka sa atong utok, sa makadaghan mamalandong kita sa pagbag-o sa kinaiya o istelo nga dinad-an sa atong sakyanan.

Hinuon matud sa mga eksperto, samtang tawo pa ang magmaneho sa mga sakyanan, dili kita makapaabot nga luwas sa disgrasya gumikan sa trapiko.