Huyang nga sistema

Nakapasar na sa unang ang-ang sa Ubos Balay Balauranan ang bill pagbalik pag-usab sa death penalty sa nasud. Kini sa dihang giaprobahan na sa House committee on justice ang sugyot nga nag-reimpose sa capital punishment o silot kamatayon.

Nauna nang gipadayag ni Presidente Rodrigo Duterte nga gusto niyang mabalik ang death penalty sa nasud, ilabina alang niadtong mga drug traffickers. Ug miani siyag suporta gikan sa iyang mga kaalyado sa Kongreso kinsa mipasaka usab og balaudnon alang sa maong katuyoan.

Hinuon niining sayo pa lamang, daghan na ang nag-alburoto batok sa maong balaudnon. Mismo ang Simbahang Katoliko ug mga pro-life groups ang nagsugod na sa ilang kampanya batok sa lakang pagbalik sa silot kamatayon.

Ug makapaabot kita nga adunay mga protesta sa kadalanan batok niining maong lakang. Gamiton gayud sa simbahan ang gahum niini aron nga dili mahibalik ang death penalty sa nasud. Dili ba nga dakong instrumento ang simbahan sa pagbaliwala sa maong balaud kaniadto?

Rason sa simbahan ug mga pro-life groups nga wala gayud kuno kasulbad ang death penalty law kaniadto. Bisan pa man sa pipila nga gi-lethal injection, padayon gihapon kuno ang mga linuog nga krimen sa nasud. Buot nilang ipasabot nga palpak ang maong balaud.

Apan sa laing bahin, ang simbahan ug mga pro-life organizations ra usab ang hinungdan ngano nga wala miarangkada ang maong balaud. Kini tungod kay matag higayon nga adunay i-lethal injection, tulin pa sa alas kuwatro nga makababag ang kaparian ug uban pang mga grupo.

Tungod kay nadala sa pressure ang kagamhanan kaniadto, namatay gayud hinuon ang death penalty law. Kay kun  kugi pa ang kagamhanan paglikidar niadtong nakalinya sa death row, imposible nga dili mosaler kadtong maong death penalty law.

Dili ikalimod nga ang paghitak sa krimen sa nasud mugna usab sa kahuyang sa sistema sa atong hustisya, ilabina sa kakulang sa ngipon sa atong mga balaud. Kini usab ang hinungdan ngano nga nag-anad na hinuon kining mga bugok sa katilingban.