Mapriso ang magkomedya labot sa bomba

Dear Atty. Divine,

Nanuroy mi sa mall ug ang akong amiga. Dihang gi-check ang among bag sa guard sa entrance sa mall, nag-joke ang akong friend nga dunay bomba ang iyang bag, giseryuso bitaw na sa gwardiya ug ila unta nga ipadakop ang akong amiga. Maayo gani kay among nahangyo ang supervisor sa mga guwardiya ug wa ra sila motawag og polis, apan mi-warning ang guard ngadto sa akong amiga. Ang akong pangutana, naa diay balaod nga magsilot kun magkomedya kalabot sa bomba? Unsa kabug-at ang silot niini kun mapamatud-an? Daghang salamat. — Elsa

Dear Elsa,

Yes, dunay balaod nga nagsilot sa mga tawo nga magkomedya labot sa bomba ug kini mao ang Presidential Decree 1727 or Anti-Bomb Joke Law. Silotan ang mga tawo nga mopakatap og mga sayop nga inpormasyon labot sa bomba or explosives. Gitumong kini aron pagpugong sa mga pranksters nga mopakatap og mga sayop nga inpormasyon labot sa hulga sa bomba nga moresulta sa kalibog sa mga tawo o posibleng kaguliyang sa publiko. Busa dili gyud maayo nga magkomedya kabahin sa bomba, ilabi na sa mga pampublikong lugar kay hayan moresulta kini sa posibleng pag-panic sa mga tawo. Kun mapamatud-an ang tawong makalapas sa Anti-Bomb Joke Law, mahimo siya nga mapriso hangtod na sa lima ka tuig ug makamulta og dili mominus P40 mil. Thanks and God bless! —Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.