May kinutoban ang pailob

Dayong banos ni Presidente Rodrigo Duterte sa Malakanyang, gibutyag sa iyang suod nga mga opisyal sa kapolisan ang intelligence report nga nagplano ang mga drug lords sa New Bilibid Prison (NBP) pagtanyag og usa ka bilyon ka pesos aron pagpapatay niya. Matag drug lord gikataho nga nitampo og P50 milyones aron pagseguro nga dili mabaraw ni Duterte ang ilegal nilang negosyo.

Apan dihang nakaasumir na si Duterte sa katungdanan, napawong ra sab ang mga huhungihong. Wa na’y naghisgot og hulga batok niya. Gani, nahibulong na lang ang kadaghanan nga ang drug lords nga gipasanginlan, gihatagan sa Department of Justice (DOJ) og immunity bugti sa ilang testimoniya batok ni Senador Leila de Lima.

* * *

Dihang niulbo ang iyang pagpanaway sa Estados Unidos ug pagpanginsulto ni Presidente Barack Obama, nipasangil si Duterte nga nagplano pagluba niya ang Central Intelligence Agency (CIA), ang gikaintapan nga ahensiya nga gilambigit sa pagpukan sa mga pamunoan ug pagpatay ni bisan kinsang nangahas sa paghagit sa Amerikanhong mga interes.

Apan human sa pagdaog ni President-elect Donald Trump, nihunong si Duterte sa iyang panaway, nitanyag og mas suod nga pakighigalaay, niuyon nga ipadayon ang Enhanced Defense Cooperation Agreement (EDCA), nilugway sa joint military exercises tali sa mga sundawo sa Pilipinas ug Estados Unidos ug mainiton nga nihangop sa bag-ong Amerikanhong embahador.

* * *

Karong bag-o, gilab-as ni Duterte ang pasangil nga nagplano ang iyang mga kaatbang, labi na ang kadagkoan sa Liberal Party (LP) nga iyang gihulagway nga wa pa kadawat sa ilang kapildehan sa niaging piniliay, sa pagpalagpot niya sa katungdanan. Subli-subli siyang nipasidaan nga mahimong ilusad ang kudeta o impeachment proceedings batok niya.

Apan si Duterte nahibawo nga wa’y mangahas paghagit niya. Nagpabiling taas ang iyang popularidad sa mga sibilyan, kasundalohan ug kapolisan, ug hingpit ang iyang pagkontrolar sa mga senador ug mga kongresista ug ang kapaspas sa komitiba sa Senado pag-absuwelto niya sa extrajudicial killings, karibalan lang sa katulin sa pagpasar sa komitiba sa House sa balaudnon pagbanhaw sa death penalty.

* * *

Daghan na og nasulti si Duterte mahitungod sa mga hulga batok niya ug sa mga pasangil batok sa iyang mga kaatbang nga napamatud-an nga dili tinuod. Ang uban wa niya kapamatud-i hangtod karon, may sukwahi na ganing mga ebidensiya nga nitumaw. May pipila nga iyang giangkon nga paukyab ra. Ang nahibilin gibakwi niya nga mga pasiaw ra.

Nabag-ohan apan gidawat sa katawhan ang mabulukon niyang sinultihan sa publiko, bahala na kun may sagol nga balikas ug binastos kay kumbinsido nga tinarong ang iyang tuyo ug nga may espesyal nga luna sa iyang kasingkasing ang mga kabos nga maoy kinabag-an sa katawhan. Apan may kinutoban ang ilang pailob. Human sa unom ka buwan, kinahanglang magsugod na si Duterte pagpakita og resulta. ([email protected])