Mga ehersisyo sa masakiton og tuhod (3)

Ang ehersisyo nga ulahing nahisgutan nato, mao ang mahitungod sa pagbisekleta nga kuhaan lang sa kadena aron dili modagan. Ipabarug lang nga nakasentro ang tukod (center stand) niini. Unya mosakay dayon nga magsige na’g sikad o tindak. Puwede sab magpahimo’g tindakanan nga may pedal  nga ipahimutang ni sa atubangan sa naglingkod, dayon magsugod na og sikad-sikad.

* Maghigda nga pinatakilid —Nakatuyhad ang lawas ug tupong ang mga tiil. Dayon, inanay nga igawas ang tuhod nga nakadapat sa sawog, samtang ang lain nga tiil, hinayhinay sab kining isaka nga nakatumong sa kisame (45degrees), nga kun asa kutob ang maabot, mopundo’g (5secs) kadiyot, unya inanay na sab ibalik sa posisyon. Balik-balika ni sa 10-15 ka beses nga mao say buhaton inigbali ug takilid. Sa pagsugod kalma ug hinayhinay lang, nga dili makalitan sa paglihok.

* Ang paglangoy —makaayo ni nga makalihok ang tanang parte sa atong lawas nga dili mabug-atan o matay-og ang tuhod, kay galutaw man sa tubig. Kinahanglang dunay kaubang makabantay nga 1-2 aron makatabang kun bikogan o kaha motukar ang panakit sa tuhod. Dili lang sab kaayo magpalawom.

* Unsa may diskarte sa pag-ehersisyo — Iseguro lang nga dili makompromiso nga mosamot ang kadaot sa tuhod. Sa paglakaw-lakaw, magmatngon nga dili mabundak ang tiil aron dili mohagtok ang lutahan sa tuhod. Ang pagdagan ug paglakaw-dagan (jogging) mao’y usa sa makapabun-og sa tuhod.

* Pahimangno — Kun sa pag-ehersisyo, mura’g manakit o mamuypoy ang bitiis o ang bagtak ug tuhod, natural ra kini. Haplasi ra og hapyud-hapyora nga  aron dili pamaolan. Apan kun sa paminaw mo permi na mosakit, ipatan-aw na og doktor.