Mga Marcos lakas ni Duterte

Nilutaw karon sa mga mata sa katawhan ang kalakas sa mga Marcos ngadto ni Presidente Rodrigo Duterte human siya nilingkod sa Malakanyang.

Una, gipalubong niini ang kanhi diktador sa Pilipinas nga si Ferdinand Edralin Marcos didto sa Libingan ng mga Bayani. Sa tanang nahimong presidente sa Pilipinas human sa Edsa People Power Bloodless revolution, si Duterte lang ang nakapalubong sa diktador sa LNMB.

Bisan daghan ang nagprotesta kay wala makauyon sa nahimo niining hukom, wala kini panumbalinga ni Duterte. Ikaduha, gipabuhian ni Presidente Duterte ang kontrobersyal nga hepe sa Criminal Investigation and Detection Group (CIDG) sa Eastern Visayas nga si Superintendent Marvin Marcos kinsa gipaubos unta sa police custody didto sa Camp Crame human gitug-an ni Albuera, Leyte Mayor Rolando Espinosa Sr. nga tigdawatan kini og suborno sa anak niining drug lord nga si Kerwin Espinosa.

Si mayor Espinosa gipriso kay daghang shabu ug armas nakuha gikan sa iyang balay. Human makabalik sa rehiyon 8 si Superintendent Marcos isip hepe sa CIDG, gipatay si Mayor Espinosa sa mga sakop sa CIDG sulod sa iyang silda sa Leyte Sub Provincial Jail.

Gipasanginlan sa mga sakop ni Marcos nga nakapatay ni Espinosa nga misukol ang mayor dihang ilang gipatuman ang search warrant nga gipagawas sa hukmanan batok ni Espinosa ug sa iyang kaubang piniriso nga si Raul Yap tungod sa paghupot og armas ug gidiling drugas.

Ang imbestigasyon nga gihimo sa National Bureau of Investigation sa pagkamatay ni Mayor Espinosa migawas nga gituyo gyud sa pagpatay ang mayor ug wala kini mosukol. Ang tanang nalambigit gipasakaan na sa NBI og kaso, apil na niini si Superintendent Marcos.

Ikatulo, posibleng palingkuron usab ni Presidente Duterte isip bise presidente sa nasud si kanhi senador Bongbong Marcos nga miduso og election protest batok kang Bise Presidente Leni Robredo. O, dili ba lakas ang mga Marcos ni Presidente Duterte?