EDITORYAL - Hulga ni Tommy

Gibutyag ni Mayor Tomas Osmeña nga mangunay siya paghimo’g paagi nga matangtang sa katungdanan ang mga konsehal sa dakbayan sa Sugbo nga mosupak sa pagbayloay og yuta sa Kapitolyo ug City Hall aron pagsulbad sa problema sa mga lumolupyo sa 93-1 Lots.

Gipirmahan kagahapon nila ni Gobernador Hilario Davide III ug Mayor Osmeña ang Memorandum of Agreement (MOA), kon kasabutan tali sa Kapitolyo ug City Hall, nga magbayloay sila og kayutaan. Apan ang kasabotan nga gipirmahan nila ni Davide ug Osmeña isumiter pa gihapon sa mga sakop sa City Council ug Provincial Board aron tukion ang iyang legalidad.

Gihulagway nga makabentaha ang Kapitolyo niining maong land swap deal kay mas lapad man ang  kayutaan nga gipanag-iya sa dakbayan sa Sugbo ang ibaylo ngadto sa probinsya bugti sa kasiguroan nga ang mga nagpuyo sa 93-1 Lots dili na gyud mapapahawa sa ilang gipuy-ang lote nga iya sa Kapitolyo ug wala pa matiwas sa pagbayad.

Ubos sa balaod, gitugot ang “Recall Elections” diin ang katawhan mohukom kun angayan ba nga tangtangon sa katungdanan ang usa ka opisyal sa rason nga nawad-an na sila og pagsalig kanila o kaha nakahimo kini og mga pangabuso.

Daan na nga mibutyag si Osmeña nga tabla ra og naghimo’g “political suicide” kadtong mga konsehal sa dakbayan nga mosupak sa gisugyot niya nga pagbayloay og yuta tungod kay sigurado man nga masuko kanila ang mga hingtungdang botante nga nagpuyo sa 93-1 Lots ug dili na gyud mobotar kanila kun magpapili sila pag-usab. Kun kining argumento ni Osmeña maoy hatagan og gibug-aton, sigurado nga kadtong mga ambisyuso kaayong konsehal nga gustong mohupot sa katungdanan, mapugos gyud sa pagpaluyo nga mahinayon ang land swap deal.

Ang bahad sa mayor iyang giluwatan tungod kay kadaghanan sa mga konsehal sa dakbayan sa Sugbo mga alyado sa Team Rama nga kaatbang nila nga grupo. Apan nindot ang pasalig ni Bise Mayor Edgardo Labella nga kun makaayo sa kadaghanan, ngano nga ila man nga supakon.