Maayo ra nga ni-resign si Leni

Angayan na gyud nga taktakon si Bise Presidente Leni Robredo isip sakop sa Cabinet ni Pres. Rodrigo Duterte. Gawas nga walay nahimo si Leni isip kalihim nga gitahasan pagdumala sa Housing and Urban Development Coordinating Council ug walay nahimo alang sa mga biktima sa bagyong Yolanda, nagpagamit pa gyud siya sa Liberal Party isip “espiya” unsay gipang-estoryahan matag Cabinet meeting sa Malacañang ug nagsige og saway sa mga palisiya sa administrasyon gamit ang media.

Daan na ko nga nagduda kang Leni nga walay idulot nga maayo sa administrasyon dihang gi-appoint siya ni Digong sa HUDCC. Tinuod nga “unwilling candidate” siya isip tandem ni Mar Roxas niadtong 2016, apan bisan human na ang piniliay, nagpagamit siya sa Liberal Party pag-atake sa administrasyon ni Digong.

Apan nag-trending sa social media ang katapolan ni Leni. Migawas ang post sa iyang mga posing sa mga magazine sa gawas, sigeng apil-apil sa mga rally batok sa paglubong ni Marcos, ug tuyok-tuyok sa bisan asang lugar daw nangampanya bisan layo pa kaayo ang eleksiyon.

Nabuko ang kawalay-hinungdan ni Leni sa dihang miduaw si Duterte sa Tacloban niadtong Nobiyembre 8 diin nahibaw-an sa presidente nga liboan pa ka biktima sa Yolanda ang wala pa makabalhin sa relocation sites sa Tacloban North tungod sa kalangay pagpatukod sa ilang mga balay, walay kuryente, tubig, panginabuhian, eskuwelahan, ug transportasyon sa mga relocation sites, mga butang nga wala gyud matagad ni Leni.

Ang depensa ni Leni mao nga ang HUDCC policy-making body lang. Apan por dios, isip housing czar ug gitahasan sa Yolanda housing, angay unta niyang atubangon ang suliran sa mga biktima sa bagyo sa Tacloban. May gahum siya niini ug ang mga ahensiya nga attached sa HUDCC sama sa National Housing Authority ug uban pa, kumpleto sa budget.

Apan human siya gi-text ni Cabinet Secretary Jun Evasco nga dili na siya patungahon sa cabinet meeting tungod sa mando ni Duterte, nagpa-interview dayon sa media ug nagdalidali og angkon nga 17,000 ka housing units ang natukod sa iyang pagdumala. Apan sa social media, gi-debate ang iyang pangangkon kay ang tinuod, ang Office of the Presidential Assistant ni Mike Dino ang nakapabalhin og 827 ka pamilya sa 911 nga na-raffle, unya aduna pay 907 nga balhinonon sa wala pa’y Pasko.

Sa wala pa mandoi si Dino ni Duterte nga mangulo sa paghuman sa Yolanda housing, walay humanhuman ang ilang relocation site ug wala gyud makabalhin ang mga biktima sa bagyo. Apan sa Facebook usab may mi-post nga si Leni gitaktak isip miyembro sa Cabinete ni Duterte kay gihimo diay kining espiya ni Senador Leila de Lima.

Nagduda ko nga si Leni ang nagtug-an ni de Lima nga si Bong Go ang nanawag kang PNP chief Bato dela Rosa aron ipabalik si CIDG-8 chief Marvin Marcos sa Leyte hangtod napatay si Albuera Mayor Rolando Espinosa.