Mga ehersisyo sa masakiton og tuhod (2)

Ang ulahing bahin nga atong nahigustan kadtong luwas nga ehersisyo pinaagi sa paglakaw-lakaw nga moabay sa likud sa sandiganan nga mura’g nagtulod sa silya. Anam-anama nga ayaw pakaliti, kutob sa mahimo lang gikan sa 5-15 mins pataas nga komportable na ilihok. Mao kini pagpalig-on sa tiil ug sa bagtak.

* Maghigda nga nakakaob — Nakaplastar ang tiyan sa sawog hasta ang mga tiil tupong nakatuyhad. Dayon, hinay-hinay isaka ang tiil, ipiko patalikod nga iabot kutob sa mahimo sa sampot. Unya, pugngi kadiyot (3-5 mins) ug hinayhinay ibalik sa posisyon.

Mao say buhaton sa pikas tiil, nga puli-pulihon sa 15 ka higayon sulod sa 5-10 mins. Kun kapoy na, morelaks kadiyot una mopadayon.

* Magsandig sa bungbong — nga nakabarug ug ang mga tiil nakaplastar o nakabika nga igo sa gilapdon sa abaga. Dayon, inanay isaka ang tuhod unya ituyhad ang tiil pasaka kutob sa maabot nga pugngan kadiyot. Ighuman, hinayhinay ibalik sa posisyon.

Mao sa’y buhaton sa pikas tiil nga puli-pulihon sud sa 5-10 mins. Ayaw ipresyor ang kaugalingon, morelaks kun kapoyan.

* Magbarug ubos sa hagdanan —Nga mokupot sa unsay magunitan nga dili matumba. Unya inanay nga isaka ug irelaks kadiyot isanday ang tikud sa tiil kutob sa maabot nga ang-ang (step) sa hagdanan. Ighuman inanay ibalik sa posisyon nga nakabarog ug mao na say buhaton sa pikas tiil nga pulipulihon sulod sa 10-15 ka mins. Kun kapoyon na, puwede ianam sa mga ang-ang ang pagsaka kutob sa maabot nga lebel sa ang-ang sa hagdanan.

* Magbisikleta — Aron dili madisgrasya kuhaan sa kadena aron dili modagan nga isentro lang sa pagbarug (center stand), dayon magsige na’g sikad sa pedal.