Pugson og imbargo ang sakyanan sa nautangan

Dear Atty. Divine,

Duna ko’y gihuwam nga kuwarta sa usa ka lending company payable for 2 years. Nagsige ko og bayad sa akong monthly obligations, apan sa miaging upat ka buwan, wa ko kabayad kay nasakit ko ug nahunong sa trabaho. Karon gipadad-an ko og demand letter sa lending company ug mihulga nga iyang birahon ang akong sakyanan kun dili ko kabayad sa maong utang.

Ang akong pangutana kun mahimo ba nga imbarguhon sa lending company ang akong sakyanan nga wa man kini nako gi-collateral sa akong utang? Unsay angay nako nga buhaton? Daghang salamat. — Jeremy

Dear Jeremy,

Kun wa kay gipirmahan nga chattel mortgage sa lending company nga imong giutangan, then dili sila makaimbargo sa imong sakyanan. Apan kinahanglan gyud ka nga mobayad sa imong utang kun moabot na ang term niini kay ang lending company mahimo man nga modangop sa korte ug mopasaka og Civil case batok kanimo for collection of sum of money.

Busa ang maayo nimo nga buhaton mao ang paghangyo sa lending company nga imong hinay-hinayan sa pagbayad ang imong utang aron ma-fully paid kini ini’g abot sa iyang term kay payable for 2 years man kaha ang maong utang. Apan kun dili kini mosugot ug iya gyud nga birahon ang imong sakyanan, mahimo nimo siya nga pasakaan og kaso for violation of Article 287, kon Light Coercions sa atong Revised Penal Code kay ang pagpugos og imbargo sa butang isip bayad sa utang usa ka kalapasan sa maong balaod. Thanks and God bless! - Atty. Divine

Alang sa inyong pangutana ipadala lang sa  Legal Corner sa Banat News sa V. Gulls St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.