Endo kontra wa’y trabaho

Gisaad ni Presidente Duterte sa iyang pagpangampanya sa niagi nga piniliay ang pagpaundang sa kontraktuwalisasyon kay wala niini kaseguroan sa ilang pagpanarbaho ang mga trabahante.

Karon nga milingkod na siya isip president, iya na nga gimando sa Department of Labor and Employment (DOLE) ang paghimo og patakaran nga magwagtang na sa hingpit sa kontraktuwalisasyon sa nasud.

Tungod niini miabiba pag-ayo sa presidente ang mga trabahante kay may kaseguroan na man ang ilang pagpanarbaho. Dili na unya sila magsige pa’g pangita og trabaho.

Dili na sila magsige og kabalaka asa sila mangita og trabaho samtang nagkaduol na ang pagkapupos sa ilang kontrata. Pero ang pangutana, makatabang ba sa walay mga trabaho ang pagwagtang sa kontraktuwalisasyon?

Klaro ug tataw nga dili pabor sa mga walay trabaho ang pagwagtang sa hingpit sa kontraktuwalisasyon kay sa Pilipinas dili abunda ang trabaho. Gani nanglangyaw naman sa gawas sa nasud ang uban kanato aron didto na lang manimpalad kay kuwang ang trabaho dinhi sa Pilipinas.

Ang pagwagtang sa kontraktuwalisasyon maisip nga kontra sa walay mga trabaho kay mosamot na gyud ka gamay ug ka nipis ang ilang kahigayonan nga makatrabaho.

Kun mawagtang na sa hingpit ang kontraktuwalisasyon,  ang mga nakatrabaho magpadayon na sa ilang trabaho hangtod sa ilang pagretiro sa edad 65.

Busa ingon ani kadugay nga magpaabot ang mga walay trabaho nga makatrabaho. Maayo lang kun daghan ang moretiro ug mamatay kay modaghan usab unya ang mabakanti nga trabaho ug daghan ang maka- apply.

Ang problema kay samtang nagpaabot ang mga walay trabaho nga adunay mangretiro ug mamatay nga mga trabahante, nagkadaghan usab ang mga nangita og trabaho. Kun aduna may moretiro o mamatay nga trabahante sa gobiyerno, dili usab makaseguro nga sila mahulipan kay gi-practice karon sa mga employer ang multi-tasking diin ang duha o tulo ka trabaho ipatrabaho na lang sa usa ka kawani.