Kalisod pagpangita og taxi
Haskang lisura na gyud sa pagpangita og taxi. Nadugangan ang paet nakong kasinatian sa pagkatanggong sa kadalanan nga wa’y masakyan niadtong Biyernes sa hapon. Human sa daklit nakong tuyo sa downtown area sa Dakbayan sa Sugbo, kinahanglan ko nga mobalik dayon sa among bukid sa Jagobiao, Dakbayan sa Mandaue aron dili mauwahi sa akong trabaho.
Apan nabawo ko sa nisunod nga tunga sa oras. Nihit ang mga taxi nga nangagi ug pulos pa gyud may pasahero. Nakahunahuna ko og suway sa Uber ug Grab apan akong nahibaw-an nga pipila na lay nanagan kay nahadlok sa agresibong kampanya sa LTFRB. Gawas pa, wa’y internet ang akong telepono.
* * *
Maong napugos ko og panawag sa karaang mga numero sa mga kompaniya sa taxi nga akong nasuwayan sa nangaging katuigan. Ang una nakong natawgan wa’y nitubag. Ang ikaduha niingon nga nanira na sila. Ang ikatulo, nga usa sa labing dako sa Sugbo, mura’g nakugang sa akong tuyo ug giingnan ko nga maghuwat.
Human sa pila ka gutlo, nangayo siya og pasaylo nga nataud-taoran sa pagpangita sa ilang radyo kay dugay na nga wa’y pasahero nga nanawag sa ilang landline, kasagaran nigamit na sa ilang online app. Pagkataudtaod, gipahibawo ko nila nga ang ilang units nga duol sa Colon nga nanubag sa radyo pulos dunay mga pasahero.
* * *
Nisuway ko og sugat sa trapiko sa Colon paingon sa eskina Legaspi. Nakadungan nako ang ubang mga pasahero nga pulos sab nangita og taxi. Pag-abot nako sa Legaspi, may bakante unta apan naunhan ko sa mas abtik nga magtiayon.
Alas-4 na ko nga niabot sa eskina Manalili, nagsugod na ko og kabalaka. Nakahunahuna ko nga mosakay nalang og PUJ ug monaog sa malls nga daghang nagpaabot nga taxi uban ang panghinaot nga dili kaayo taas ang linya sa nagdali sab nga mga pasahero. Labihang lipaya nako dihang gikamay ko og taxi driver nga nilapas na sa akong gibarugan kansang pasahero mao pa’y pagkanaog.
* * *
Gipasabot ko sa drayber nga ang tinuod nga hinungdan sa kalisod pagpangita og taxi mao ang kahuot sa trapiko. Matud niya nga bisan mas daghan na ang pasahero kay nagsugod na ang mga kompaniya pagpanghatag og bonus, wa mosaka ang ilang kita kay natanggong sila sa kadalanan.
Samtang nag-aginod mi paingon sa Mandaue, nakasabot na ko nga bisan sa pagsubli-subli sa LTFRB nga kolorum ang Uber ug GrabCar, may mga pasahero gihapon nga moinsistir pagkuha sa ilang serbisyo.
Mas sayon ug luwas ang pagpaabot og kasakyan sulod sa mga buhatan ug mga pinuy-anan kay sa magduas sa kadalanan. Salamat sa akong katihik, uwahi na ko nga nakamatngon nga mahimo ra man gyud diay unta nga i-activate ang akong mobile internet ug magpaabot og sakyanan samtang nangape inay nagbahas-bahas sa downtown.
- Latest
