EDITORYAL - Pasalig ni Digong

Maayong paminawon nga gikan na gyud ni Presidente Rodrigo Duterte ang pasalig nga dili siya modeklarar og Martial Law. Kini bisan pa sa mga hulga sa terorismo ug ekstremistang grupo gikan sa Mindanao.

Husto gyud kun tumanon ni Presidente Duterte ang iyang pamahayag kay karong mga panahona, ang Martial Law maoy labing maot nga pamaagi sa usa ka lider sa pagdumala sa iyang nasud.

Pipila nalang ka nasud nga padayong gipaubos pa sa Martial Law sa ilang mga lider tungod sa matud pa hulga sa kalinaw sa ilang dapit.

Kun tan-awon pag-ayo, wa’y nasud nga ubos pa gihapon sa martial rule nga milambo tungod kay nagpasabot kini nga wa’y gahum ang sibilyang gobiyerno.

Ubos sa Martial Law, ang militar ug kapolisan maoy gamhanan ug dinhing dapita adunay mga pag-abuso nga mahitabo ngadto sa mga yano nga sibilyan.

Ang Pilipinas usa sa mga nakatagamtam sa kabangis sa martial rule sa kanhi diktador nga si Ferdinand Marcos ug dili lalim ang pag-antos nga giagian sa mga Filipino niadtong panahona.

Nakita sab tingali ni Presidente Duterte nga kun modeklarar siya og Martial Law, mas daghan hinuon nga mga inosente ang mag-antos, imbes nga kadtong mga abusadong tawo maoy paantuson tungod sa ilang mga salaod.

Ang pagpalig-on sa mga mayor ug gobernador batok sa mga krimen ug hulga sa katilingban, maoy haum nga paagi. Dakong sayop nga kun dunay usa ka parte sa lawas nga may samad ug nag-umido, patyon na lang ang tibuok lawas aron masanta ang impeksyon.