Bischika ni Yuri; Hilas, mura’g kinsa!

BisChika nga Domingo mga KaBisChika!
Hala oi pila na lang ka adlaw magsaulog
na usab ako sa akong adlaw natawhan. Nakaingon ko sa akong kaugalingon nga kadali sa dagan sa panahon. Mapasalamaton kaayo ko sa Kahitas-an nga maayo ang akong lawas. Siguro aduna ko’y mga birthday wishes para sa akong kaugalingon pero mas ganahan ko nga mapaambit kini ug makatabang sa uban. Ingon bitaw sila ang kalipay nga imong mahatag sa laing tawo kay dili kabayran. Hugot lang ang drama? Hahahahha! Bitaw, kidding aside, sa akong adlaw natawhan nanawagan ko sa Facebook account nako kun plano mo nga muhatag og birthday gift sa inyong Mother Butanding… ang akong pangayoon dili para kanako apan para sa mga bata sa Missionaries of Charity sa Suba Pasil. Wala nako damha nga dunay nitubag sa maong post ug gusto nila mahimong parte sa YUR GIFTS mao nga sa pagkakaron pa lang… gikan sa akong dakong kasingkasing… DAGHANG SALAMAT KANINYO!!!! Sa mga gusto pa nga mohatag og Yur Gifts sa inyong Yur’s truly pwede kaayo og mga gatas para sa mga bata nga nag-edad og 4 years old – 6 years old;  pwede pud mga Vitamins C, mga sabon nga panglaba, Liquid dishwashing ug uban pa. Pwede ko ninyo e-PM sa akong facebook account YURI RICHARDS kay bisitahon nako sila karung October 30 Domingo, usa ka adlaw sa dili pa nako birthday. Mga KaBisChika kitang tanan adunay mga pagsuway nga giagian karun apan ayaw kahiubos o mawagtangan ug paglaum kay kanang tanan adunay solusyon. Mag-ampo  lang gyud!  Amennnnn!

Pero kining para sa atong Kinsa Siyaaaaaa???? Usa ka local fashion designer ang nagpahungaw sa iyang gibati sa iyang kasinatian sa usa ka beauty pageant. Wala nakauyon ang local fashion designer kauban ang iyang assistant sa gibuhat sa usa ka staff sa beauty pageant, kay ang eksena mao kini: Pagsulod nila sa holding area sa mga candidates kay gisinggitan si local fashion designer ug staff nga pagawson sa maong area. Una, nisulod ang local fashion designer ug assistant tungod kay usa siya sa mga mo dress up sa usa ka candidate. Wala gyu’d problema sa local fashion designer nga pagawson sila pero ang singgitan siya ug tulisukon pa murag didto niulbo ang iyang kaspa. Nakaingon si local fashion designer walay “K” ang maong staff sa beauty pageant nga maghinilas. Pwede ra gyud siya BisChikahon og tarong. “ Dili tungod kay apil ka sa mga staff sa maong event, mura naka og kinsa “ sigon pa ni local fashion designer. Iyang hagit sa maong staff sa beauty pageant… check my background! O.diba? Bongga si local fashion designer naa siya’y dakong “K” nga mo lenggua og check my background kay sa tinuod lang pud dili siya basta basta nga local fashion designer. Daghan na siya na dress up nga mga celebrities both local and national ug iyang mga creations gidala sa gawas sa nasod para sa usa ka event. Kinsa si staff nga nagyawyaw? Staff siya sa usa ka beauty pageant nga bag-o lang nahuman ang ilang fiesta. Maka-relate ko sa ilang fiesta tungod sa akong lawas! Hahahahahha!

Ayaw usab ninyo sipyata karung adlawa ang Grand Coronation sa Miss Gaisano Grand 2016 Inter-School Beauty Quest nga didto mahitabo sa Gaisano Grand Mall Mactan alas kwatro sa hapon. Kinsa kaha ang makalangkat sa maong titulo? Special guest ang celebrity teen star Joshua Garcia! Ug dili kay kana lang ha? Mobisita ang casts sa GMA 7 Alyas Robinhood nga silang Dingdong Dantes ug Andrea Torres sa Gaisano Fiesta Mall Tabunok Parking Lot alas kwatro sa hapon para sa Kapuso Mall Show.