Nipiyait giunay sa amo

CEBU, Philippines - Patay ang usa ka giingong bata-bata sa drug pusher human siya giingong giunay pagpusil sa iyang amo kay gidudahan kining maoy misumbong sa mga otoridad kabahin sa pagpamaligya niini og ilegal nga drugas diha sa sitio Galaxy, Brgy. Tanke, Dakbayan sa Talisay. Ang biktima mao si Mark Paul Reyes alyas Macmac, 20, nagpuyo sa nahisgutang lugar.

Si Supt. Aileen Recla, pangu sa kapulisan sa maong dakbayan niingon nga nagbarog lang sa karsada ang biktima sa dihang gipusil sa duha ka mga lalaki diha sa iyang dughan hinungdan sa iyang hinanaling kamatayon.

Nakarekober og duha ka kabhang sa bala sa .45 kalibre nga armas ang kapulisan sa crime scene.

Nagkanayon si Recla nga ila nang nailhan ang suspetsado apan nagdumili lang una sila sa pagbutyag sa pangalan samtang padayon pa kini nila nga gipangita. Asoy pa ni Recla nga ang biktima bata-bata sa usa ka drug pusher ug namaligya man sab kini og ilegal nga drugas.

Apan ang amo sa biktima ang naglagot sa naulahi tungod kay siya maoy nisumbong sa mga otoridad bahin sa iyang ilegal nga kalihukan.

Dugang pa ni Recla nga ila nang nahimoan og buy-bust operation ang suspek apan nakaipsot lang kini. Hinuon aduna na siya’y warrant of arrest tungod kay ila man kining napasakaan og kaso. (BANAT NEWS)