EDITORYAL - Gamay apan midako

Ang pagsukol og broka sa hukmanan hangtod nga moabot gayud ang kaso sa Korte Suprema usahay makaayo, apan usahay usab makapasamot na hinoon kadako sa problema.

Dunay mga gagmay ra kaayo nga bayranan nga kuwestyonon ra gyud sa mga opisyal, apan kay napilde man kini sa maong kaso, ang gamay ra unta nga kantidad nahimo na hinoon nga dakong obligasyon.

Mao kini ang nahitabo sa dakbayan sa Sugbo nga karon gipadad-an na sa hukmanan og Notice of Garnishment aron kuhaon gikan sa iyang deposito sa Land Bank of the Philippines (LBP) ang P57 milyones nga para bayad sa yuta nga gipanag-iya ni Roque Ting.

Ang gamay’ng parcela sa yuta ni Ting nga nahimutang sa Sitio Mawmawan, San Roque, Talisay naapil sa gihimong reclamation project kaniadtong dekada 1990.

Ang luna diha mahimutang kaniadto sa tuo kilid nga bahin sa taytayan nga nagdugtong sa South Road Properties (SRP) ug sa Barangay San Roque.

Aron paglikay nga modako ang isyu kaniadto, andam unta si Mayor Tomas Osmeña (atol sa una niya nga termino) nga bayaran lang ang maong kantidad apan gibabagan kini nila ni kanhi Vice Mayor Michael Rama ug Konsehal Joy Pesquera. 

Misang-at og kaso si Ting sa Regional Trial Court (RTC) ug napilde ang dakbayan nga gimandoang mobayad og P39 milyones, apan wala gihapon mobayad si Rama nga mayor na atol sa maong higayon.

Ang kaso miabot sa Korte Suprema ug karon ang kantidad miabot na og P57 milyones. Sila si Rama ug Pesquera maoy gibasol pag-ayo ni Mayor Osmeña sa pagtubo sa kantidad nga karon dili na gayud kapugngan pa.