Undang na sa pagmika

Tinuod ba gayud nga ang Sugbo maoy labing worst nga lugar alang sa mga drayber? Daghan man gud ang mipiyait sa resulta sa usa ka survey nga nagpakita nga ang Metro Cebu maoy labing bati nga lugar nga drayban sa tanang metropolitan areas sa kalibotan.

Matud pa sa uban nga mas grabe pa ang Metro Manila kay sa Metro Cebu. Kini tungod lagi sa ka seryoso sa problema sa trapik didto sa kaulohan nga mukaon na'g pipila ka oras matag adlaw ang kalangay sa mubo lamang nga destinasyon.

Hinuon, kun ang problema sa sitwasyon sa trapik ang hisgotan, dili malalis nga mas grabe  didto sa kaulohan. Mas puwerhisyo ang paghanot sa dagan sa mga sakyanan didto kada adlaw, ilabina panahon sa rush hour.

Apan dili nato ikalalis nga nagkaseryoso na usab ang sitwasyon sa trapiko sa Metro Cebu. Hinuon dili sama ang Sugbo sa Metro Manila diin nagkamang ang dagan sa mga sakyanan matag adlaw. Apan kun dili gayud kini masulbad, masusama gayud ang Sugbo sa kaulohan sa dili madugay.

Hinuon daghang sirkumstansiya ngano nga ang Sugbo maoy labing worst nga lugar sa kalibotan alang sa mga drayber. Dili lamang sa kahuot sa trapiko, dili usab ikalimod nga daghan sa mga motorista dinhi ang kulang sa disiplina.

Ang nakaseryoso sa maong problema mao nga daghan sa mga drayber dinhi ang wala nagsunod sa lagda sa trapiko. Naay uban nga pataka lamang og overtake bisan kun wala sa lugar, nga maoy usa sa rason nga naka-contribute usab sa problema sa kadalanan.

Hinaut nga magsilbi kining resulta sa survey isip dakong leksiyon sa mga lumolupyo dinhi sa Sugbo. Nga angay nang hatagan og dinaliang aksiyon kining nagkaseryoso nang problema sa dagan sa trapiko sa Metro Cebu sa daling panahon.

Bitaw. Kuyaw tuod nga masiyakoy kitang tanan kun padayon nga walay kasulbaran kining maong problema. Mao nang angay nga hunongon na sa lokal nga otoridad ang ilang pagmika ug aksiyonan na kining maong suliran.