Gubat batok sa lamok

Kanunay nga gipadayag sa Department of Health nga dili angayang ikaalarma ang zika virus sanglit dili kini ingon ka deadly, kun itandi sa dengue virus.

Apan ang ilang gipakita nga atensyon sa naasoy nga balatian wala man motukma sa ilang gipamulong nunot sa paghatag nila og espesyal nga pagtutok sa mga tawo nga nataptan sa kagaw sa zika.

Dinhi sa dakbayan sa Sugbo, natala ang usa ka local transmission sa zika virus nga mitakboy sa usa ka 22-anyos nga babaye. Limitado ug generic information ra ang giluwatan sa kadagkoan sa DOH-7.

Ang identity sa pasyente wala ibutyag, lakip na ang tambalanan diin kini na-admit ug kun asa nga barangay kini nagpuyo. Makasabot man kita sa gihimo sa DOH aron maprotehean ang pasyente gikan sa posibleng negatibo nga pagtan-aw sa uban nga wala pa makasabot sa pagtakboy sa kagaw nga zika.

Ang mga kauban sa panimalay sa 22-anyos gikuhaan og blood sample nga gisumiter sa Research Institute for Tropical Medicine or RITM aron maseguro kun nataptan ba sila sa virus. Maayo man ang gihimo sa DOH apan mura na man hinoon og unsa ka delikado ug mananakod nga balatian ang zika virus nga kinahanglan gyud nga ibutang sa confidential bisan man lang ang dapit o barangay diin natala ang kaso sa zika, dili nila ibutyag.  Ang aksyon sa DOH makahatag hinoon og kabalaka ug kahadlok sa katawhan. Sama sa dengue, makuha ang zika virus gikan sa lamok nga aedes agypti, apan mas delikado ug makamatay ang dengue nga maoy angayan nga hatagan og espesyal nga pagtagad, dili lang sa DOH, kon dili kitang tanan.

Sumala sa DOH nga kaniadto wala hatagi og gibug-aton ang zika virus sanglit dili man dako kaayo nga hulga sa kinabuhi, apan gitutokan kini human masuta nga makamugna kini og dautang epekto sa utok sa bata nga anaa pa sa sulod sa tiyan sa inahan nga nataptan sa virus. Usa lang ang atong kontra nga mao ang aedes agypti nga nagdala sa dengue, chikunggunya ug zika virus nga angayan natong tutokan pagsumpo aron dili makapamiktima. Kini sama sa taskforce 3-in-1 nga giumol sa Provincial Health Office sa pagpakiggubat sa mga lamok nga nagdala sa mga balatian.