EDITORYAL - Hinuktuki pag-ayo

Idayon gyud ni Cebu City Mayor Tomas Osmeña ang pagpakanselar sa kontrata pagbaligya sa 45 hektareyas nga kayutaan diha sa South Road Properties (SRP) ngadto sa tulo ka dagkong investors.

Gitug-an ni City Legal Officer Joseph Bernaldez nga gamay na lang gyud ang kuwang sa gikinahanglan nilang dukomento aron nga maduso na sa hukmanan ang kaso sa pagpakanselar sa kontrata sa dakbayan ngadto sa SM-Ayala Consortium ingon man sa Filinvest Land Inc.

 Miabot og 45 hektareyas nga kayutaan ang napalit sa maong mga investors sa kantidad nga kapin sa P16 Bilyones. Ang nakabaligya niini mao ang administrasyon ni kanhi mayor Michael Rama.

Gihulagway ni Osmeña nga barato ra kaayo ang pagbaligya sa yuta sa kantidad nga P38 mil  matag metro kuwadrado. Nagtuo si Osmeña nga kay natukod na man ang higanteng SM Seaside, ang yuta diha sa SRP mahalin na og mga P70 mil ang metro kuwadrado. Kini maoy rason nga samtang ang dakbayan sa Sugbo adunay daghang kuwarta karon nga halin sa SRP lots, apan wala kini ipagamit ni Osmeña kay tinguha man niyang ipakanselar ang kontrata sa pagbaligya.

Tinuod, dako gyud kaayo ang alkanse sa kagamhanan sa dakbayan kun tuohan nato nga misaka na pag-ayo ang kantidad sa kayutaan diha sa SRP, apan ang pagpakanselar sa kontrata sa pagpalit sa maong kayutaan tingali’g maabtan kini og “siyam’siyam.”

Tingali, mahuman na lang ang tulo ka tuig nga termino ni Osmeña, dili pa maresolbar kining kasoha ug anugon nga ang dakong kantidad sa salapi nga magamit na unta pagsulbad sa mga problema dinhi sa dakbayan, sama sa lunop ug baha, matanggong lang sa panudlanan.

Angay tingali kini nga hinuktokan pag-ayo ni Osmeña kun ipadayon ba gyud ang tinguha pagpakanselar sa kontrata sa pagbaligya o gamiton na lang ang halin sa mga proyekto nga makaayo sa katawhan. Dako pa ang nahabiling yuta diha sa SRP nga wala pa mabaligya.