Firecrackers ban na pud

Gumikan sa kadaghang disgrasya panahon sa pagsaulog sa Pasko ug Bag-ong Tuig, gumikan sa pagpabuto, daghan na ang mga pagsuway sa Kongreso pagdili na, o pag-ban sa bisan unsang matang sa pabuto, apan wala kini magmalampuson.

Tungod niini, daghan gihapon ang nabuthan, ug ang uban na-ospital gyud, atol sa pagsaulog sa Pasko ug Bag-ong Tuig kaniadtong niaging tuig. Kini, bisan sa mga panigkamot sa gobiyerno nga kalikayan ang maong mga kadaot. Karon, at least duha ka senador ang mibanhaw sa paningkamot nga ma-ban na gyud sa tibuok nasud ang bisan unsang matang sa pabuto, sa tanang okasyon, ug dili lang kay pahanon ra sa Pasko ug Bag-ong Tuig.

Ang duha, ka senador mao sila si Vicente Sotto III ug Sherwin Gatchalian. Malaumon sila nga karong higayona, kadid-an na gyud ang pagpabuto sa bisan unsang matang sa pabuto sa tibuok nasud.

Nagtuo sila nga kay nahimo man kini ni Presidente Duterte dihang mayor pa siya sa dakbayan sa Davao. Gani nagtuo sila nga ipatuman na ni Duterte ang firecracker ban sa tibuok nasud. Sa miaging tuig, gikan sa Dec. 21, hangtod Enero 5, karong tuiga, 929 ka tawo ang nakaangkon og injuries, kon mga naangol. Kini sa gikataho lang, wa pay labot sa wala lang moreport sa mga doktor. Sagad sa mga naangol mga bata.

Sa iyang pag-file sa ikaduhang higayon sa firecracker ban bill, si Sotto nagkanayon: “there is now a good chance of passage with Duterte at the helm of government.” So, dako ang kahigayonan (dili tsansa – sa mga Tagalog pa) nga mapatuman kini sa tibuok nasud.

Ug malagmit nga kay wa na may pabuto unya, ibalik na sa simbahan ang Midnight Mass sa Pasko, kanang tinuod gyud nga tungang gabii. Unya mahimo nga Noche Buena.

Ang pagsugat sa Bag-ong Tuig mingaw na man unya ni, ayaw na la’g mata. Kun momata man, tan-aw la’g TV o paminaw sa radyo. Mahimo nga mag-Noche Buena na pud. Or balik na lang pagkatulog, unya na sugata ang Bag-ong Tuig inigmata nimo. Sa iyang bahin, si Gatchalian namahayag: “Every year, we endure the pollutants caused by the use of firecrackers to welcome the New Year.”  So, gawas sa kasaba ug sa mga injuries nga mahiaguman sa tawo, madaut usab ang atong environment gumikan sa pollution.

Would it make any difference to you, kun sa atong pagsaulog sa Pasko ug pagsugat sa Bag-ong Tuig, wala nay mga pabuto? Dili ba gud mahinayon ang Pasko ug dili ba mabag-o ang Bag-ong Tuig kun dili ta magpabuto?

Atong paabuton unya ang Pasko ug Bag-ong Tuig, minus the firecrackers!