Gumonhap sa basura
Dili sayon ang pagpangolekta sa basura sa Dakbayan sa Sugbo. Apan wa magmahay si kanhi Konsehal Bob Cabarrubias sa iyang pagdawat sa tanyag sa pagdumala sa Department of Public Services (DPS).
Matud ni Cabarrubias, dakong hagit ang paggamit sa iyang katakos ug kasinatian isip inhinyero sa paghusay sa komplikado nga problema nga nihamok sa mga molupyo sulod sa daghan na uyamot nga katuigan.
Bisan sa nag-ung-ong nga petisyon sa Writ of Kalikasan nga gipasaka ni Konsehal Joel Garganera, nipasabot si Cabarrubias sa Arangkada sa DYAB Abante Pa, Bisaya! nga naningkamot sila nga magpadayon ang operasyon sa Inayawan Sanitary Landfill nga dili na makahasol sa naglibot nga mga barangay.
* * *
Gibutyag ni Cabarrubias ang mosunod nga kausaban sa landfill nga gipasiugdahan ni Mayor Tommy Osmeña:
Nagsugod nang pagpauwan og enzymes sa basura aron nga kamenosan kun di man hingpit na nga mawagtang ang pag-alisbo sa baho nga nakahasol sa mga molupyo sa duol;
Ipatuman na karong semanaha ang pagbuwag sa mga basura nga malata ug dili malata aron nga maibanan og dul-an sa katunga ang mga basura nga ihatod sa Inayawan; ug
Nangabang ang City Hall og lima ka pribado nga 10-wheeler trucks nga manghipos ug manghakot sa mga basura gikan sa kabarangayan paingon sa Inayawan tibuok adlaw ug gabii.
* * *
Sa hingpit nang pagbanhaw sa “No segregation, No collection policy” sa tibuok dakbayan sugod ugma, Miyerkules, gipahibawo ni Cabarrubias ang mosunod nga schedule sa koleksiyon sa nagkalainlaing matang sa basura:
Ang mga basurang malata (pagkaon, papel ug dahon) kolektahon sa mga adlaw’ng Lunes, Miyerkules, Biyernes ug Sabado;
Ang mga basurang dili malata (plastik, botelya, puthaw ug lata) ug residual (napkins ug diapers) kolektahon sa mga adlaw’ng Martes, Huwebes ug Domingo;
Lahi nga mga basura (gadgets ug pundir nga mga suga) buwagon og kolekta sa ahensiya nga may pagtugot sa Environmental Management Bureau (EMB).
* * *
May pipila hinuon ka kakulian nga nasugatan sila si Cabarrubias sa pagpatuman sa kausaban sa landfill:
Ang sunudsunod nga bunok sa uwan nisangpot sa paglapok sa filling materials nga gitabon sa bag-ong gilabay nga mga basura maong nangalubong ang heavy equipment apil na ang mga trak nga naghakot sa basura sa kabarangayan; ug
Nagguba ang bulldozer nga gipahuwaman sa pribadong kontraktor kay nasudlan og mga plastik ug niungot ang pipila ka bahin sa ekipo.
Mangabang na hinuon ang City Hall og pribadong bulldozer aron nga kun madaot kapulihan dayon og lain ug busa dili na mahasol ang kinatibuk-ang operasyon sa landfill.
Matud ni Cabarrubias, maoy dakong bentaha sa pagpangabang og garbage trucks kay kun may maaberiya kapulihan dayon og laing mga trak sa gikontrata nga supplier ug busa dili na matanggong ug mangalisbo ang mga basura sa kabalayan.
- Latest
