Gubat batok sa drugas

Sigun sa akong nakita, ang gubat nga gilusad sa gobiyerno batok sa gidiling drugas nahimo na usab kining gubat ni Presidente Rodrigo Duterte ug Senador Leila De Lima.

Mao kini ang rason ngano nga si Kongresista Rodrigo “Bebot” Abellanosa nangutana ngadto kang Justice Secretary Vitaliano Aguirre atol sa gipahigayon nga congressional investigation kun ang gihimo karon sa gobiyerno ni Presidente Duterte, gubat pa ba kini batok sa drugas o gubat na batok kang Senador De Lima.

Si Senador De Lima mao ang numero uno nga kritiko sa gobiyerno ni Presidente Duterte tungod sa hapit na moabot og tulo ka libo ka gidudahang drug users ug pushers nga gipangpatay nga iyang gihulagway nga gilapas ang ilang tawhanong katungod.

Sigun sa atong nakita, ang gubat batok sa gidiling drugas miabot na sa punto nga personalan ug ang motibo sa imbestigasyon sa Kongreso ug Senado nahimo na nga kadudahan, apil na ang mga saksi nga gipangpresentar.

Sa ubos balay-balauranan, gipresentar ni Justice Secretary Vitaliano Aguirre ang mga konbiktadong kriminal nga mihimo’g pamahayag batok kang Senador De Lima, samtang sa Senado gipresentar ni Senador Leila De Lima ang nagpailang sakop sa Davao Death Squad nga nihimo usab og pamahayag batok kang Presidente Duterte.

Ang nagpailang sakop sa Davao Death Squad miangkon nga ang ilang grupo nakapatay na og subra usa ka libo ka tawo, kasagaran kanila mga kriminal, tungod sa sugo sa kanhi mayor sa Davao nga karon presidente na sa nasud.

Ang motibo sa mga saksi nga gipresentar ug sa mga nagpresentar kanila, pulos na kadudahan tungod kay pulos sila adunay kaaligutgot ug kalagot sa matag usa.

Ang sumpay niini, inyong mabasa sa lindog nato karong Huwebes.